Փաշինյանը գնաց Անկարա. կհանդիպի՞ արդյոք բրիտանական հետախուզության պետին

Հայաստանի վարչապետի պաշտոնը զբաղեցնող Նիկոլ Փաշինյանն այսօր մեկնում է Թուրքիա, մասնակցելու է նախագահ Ռեջեփ Թայիփ Էրդողանի երդմնակալության արարողությանը։ Վարչապետի աշխատակազմից տեղեկացրել են, որ Հայաստանը Թուրքիայից հրավեր է ստացել և Փաշինյանը աշխատանքային այցով կմեկնի Անկարա։

Նրա գլխավորած պատվիրակության կազմը դեռևս չի հրապարակվել, պարզ չէ, թե Փաշինյանի հետ ովքեր են Թուրքիա մեկնում։ Ի դեպ Փաշինյանը Թուրքիա է մեկնում օդային ճանապարհով, թեև Թուրքիան տևական ժամանակ փակել է իր երկինքը հայկական օդանավերի համար՝ դժգոհելով Երևանում «Նեմեսիս» գործողությանը նվիրված հուշարձանի կառուցման փաստից։

Դրանից հետո ընդամենը մեկ-երկու հայկական ինքնաթիռներ են թռել Թուրքիա, այն էլ միայն պաշտոնական մակարդակով։ Օրեր առաջ էլ Փաշինանը Քիշնև մեկնելու համար ստիպված է եղել առնվազն 2 անգամ խնդրել Թուրքիային՝ բացել օդային սահմանը իր ինքնաթիռի համար։

Մեր աղբյուրների փոխանցմամբ՝ Փաշինյանը Թուրքիայում մի շարք հանդիպումներ կունենա։ Աննախադեպ է, որ Թուրքիան նման կարևոր միջոցառման հրավիրում է մի երկրի ղեկավարի, որի հետ չունի դիվանագիտական հարաբերություններ։ Անկարայում ոչ միայն արարողակարգային հանդիպումներ են լինելու, այլ նաև, ըստ ամենայնի, կլինի առանձին հանդիպում Թուրքիայի նախագահ Էրդողանի հետ։

Մեր աղբյուրները նշեցին, որ Փաշինյանը կարող է նաև ունենալ հանդիպումներ, որոնց մասին հրապարակային հայտարարություններ չեն լինի, մասնավորապես Թուրքիայում է գտնվելու բրիտանական հետախուզության «MI6-ի» ղեկավար Ռիչարդ Մուրը, որը ժամանակին աշխատել է Անկարայում, եղել բրիտանական ռեզիդենտուրայի ղեկավարը և համարվում է Էրդողանի մտերիմ ընկերը։ Թուրքիայում մինչև օրս էլ կարծիքներ են շրջանառվում, թե Էրդողանը կապված է անգլիական հետախուզության հետ Մուրի միջոցով։ Թե ինչ հարցեր է Փաշինյանը քննարկելու բրիտանական հետախուզության ղեկավարի հետ հայտնի չէ։

Որոշ ժամանակ առաջ էլ Ռիչարդ Մուրը գտնվել է Հայաստանում և հանդիպել Նիկոլ Փաշինյանին, այն ժամանակ էլ որևէ կերպ չհայտարարվեց, թե ինչ հարցեր են քննարկվել։ Ի դեպ, ռուսական և Կրեմլի մոտ կանգնած բազմաթիվ շրջանակներ տևական ժամանակ հայտարարում են, թե Նիկոլ Փաշինյանը բրիտանական նախագիծ է և իշխանության է բերվել առաջին հերթին անգլոսաքսոնական շահերն առաջ մղելու։ Մասնավորապես որոշ ռուս փորձագետներ պնդում են, թե Փաշինյանն ամեն ինչ անում է Հայաստանը լիկվիդացնելու և Թուրքիայից կախվածության մեջ դնելու համար։

Արմինե Ալեքսանյան