Թուրքիան շարունակում է սպառնալիքներ տեղալ Հայաստանի հասցեին

Նախօրեին Անթալիայում Թուրքիա ժամանած Ադրբեջանի պատվիրակության լրագրողների հետ զրույցում Թուրքիայի արգործնախարար Մեվլութ Չավուշօղլուն կրկին անդրադարձել է Երևանում մեկ ամիս առաջ տեղադրված Նեմեսիսի արձանին, հայտարարել, թե հույս ունեն, որ Հայաստանը կուղղի իր ձևակերպմամբ սխալը, հակառակ դեպքում սպառնացել է նոր միջոցներ ձեռնարկել։ «Հայաստանում՝ Երևանում անցյալում մեր ադրբեջանցի եղբայարների օսմանյան շրջանի մեր զինվորներին և դիվանագետներին, նահատակած ահաբեկիչների համար արձանի կանգնեցնումն անընդունելի քայլ էր, մենք էլ որոշ միջոցներ ձեռնարկեցինք, փակեցինք մեր օդային սահմանը երրորդ երկրներ գնացող ինքնաթիռների համար»,- ասել է Չավուշօղլուն, նա նաև հայտարարել է, թե Թուրքիան շարունակելու է աջակցել Ադրբեջանին բոլոր հնարավոր մեթոդներով։

Երևանի Օղակաձև զբոսայգում Նեմեսիս գործողության հեղինակներին նվիրված հուշակոթող աղբյուրը բացվել էր ապրիլի 25-ին, արձանը հավերժացնում է 1915 թվականին Հայոց ցեղասպանություն իրականացրած երիտթուրք պարագլուխներից և 1918 թվականին Բաքվում հայերի ջարդերի կազմակերպիչներից վրեժ լուծած հայորդիների հիշատակը։ Պաշտոնական Անկարայի և Բաքվի դատապարտումներից հետո, Նիկոլ Փաշինյանը սկսել էր արդարանալ, ավելին՝ Երևանի քաղաքապետարանին մեղադրել Նեմեսիս գործողության հուշարձան տեղադրելու համար։

Փաշինյանական իշխանությունից տարանջատվելու քայլեր անող Ավինյանը, ինչպես շաբաթներ առաջ, այնպես էլ երեկ, կրկին անդրադարձել է հուշարձանի շուրջ բարձրացրած աղմուկին, հայտարարել, թե Նեմեսիսի արձանը որևէ երկրի, կամ ժողովրդի դեմ չէ, դա մեր ազգային արժանապատվության հուշարձանն է։ Եվ մինչ Թուրքիան շարունակում է Հայաստանին սպառնալիքներ տեղալ և նորանոր նախապայմաններ առաջադրել, նույնիսկ թուրքական կողմի այս հայտարարությունները փաշինյանական իշխանությունը փորձում է օգտագործել ներքաղաքական իրավիճակում դիվիդենտներ հավաքելու և սեփական թեկնածուի վարկանիշը ավելացնելու համար։ 

Նունե Անանյան