Փոխադարձ խայթոցներ Լավրով-Միրզոյան հանդիպմանը

Մոսկվայում երեկ կայացել է Հայաստանի, Ռուսաստանի և Ադրբեջանի արտգործնախարարների եռակողմ հանդիպումը, դրանից առաջ էլ Սերգեյ Լավրովը առանձին հանդիպում է ունեցել Արարատ Միրզոյանի և Ջեյհուն Բայրամովի հետ։

Թեև պաշտոնապես նշվում է, որ հանդիպումներն անցել են կառուցողական հունով, Երևանն ու Բաքուն մոտ են տրանսպորտային հաղորդակցությունների ապաշրջափակման հարցում վերջնական համաձայնությանը, ըստ էության բոլոր այս հանդիպումներն անցել են բավականին կծու տոնայնության մեջ։

Ռուսաստանի արտգործնախարարը պարզ և հստակ Արարատ Միրզոյանի հետ հանդիպմանը նախազգուշացում է արել Հայաստանին։ «Ռուսաստանը պատմական դեր ունի այս տարածաշրջանում և լուրջ շահեր, վստահ եմ որ մեր դաշնակիցները հասկանում են դա»,- ասել է Լավրովը Արարատ Միրզոյանի հետ փակ հանդիպումից առաջ։

Ըստ էության Լավրովի այս նախազգուշացումը նշանակում էր, որ Ռուսատանը բնավ մտադիր չէ լքել Հարավային Կովկասի տարածաշրջանը և ամեն գնով պաշտպանելու է իր շահերը։ Որքան էլ տարօրինակ է Արարատ Միրզոյանը բոլորովին էլ տակ չի մնացել և փոխադարձ խայթոցներով պատասխանել է Սերգեյ Լավրովին։ «Գետնի վրա իրավիճակն այլ է, բանակցություններին զուգահեռ մենք պարբերաբար տեսնում ենք իրավիճակի սրում Ադրբեջանի կողմից, տեսնում ենք ներխուժում Հայաստանի ինքնիշխան տարածք, տեսնում ենք նոյեմբերի 9-ի հայտարարության կոպիտ խախտումներ, դրա վերջին օրինակը սահմանային անցակետ տեղադրելու փորձն է Լաչինի միջանցքում, թեև նոյեմբերի 9-ի հայտարարության մեջ շատ հստակ ամրագրված է այս միջանցքի գործունեության ռեժիմը։ Այն պետք է մնար ռուս խաղաղապահների հսկողության տակ, ցավոք այժմ հնարավոր չէ արձանագրել, որ Ռուսաստանը վերահսկում է Լաչինի միջանցքը»,- ասել է Հայաստանի արտգործնախարարը։

Հենց Մոսկվայում Ռուսաստանի արտգործնախարարի դեմքին նետելով այս արձանագրումը՝ Միրզոյանը փաստացի Ռուսաստանին ձեռնոց է նետում։ Ի դեպ, եթե նախկինում Հայաստանի և Ռուսաստանի արտգործնախարարների հանդիպումներն ավարտվում էին սովորաբար Արարատ Միրզոյանի կմկմոցներով, ապա այս դեպքում գործ ունենք մի իրավիճակի հետ, երբ Միրզոյանը, թերևս արևմտյան հովանավորների աջակցությամբ, այլևս կարողանում է խայթել ռուսական կողմին։ Թե ի՞նչ հետևանքներ կունենա այս ամենը Հայաստանի և ղարաբաղյան հակամարտության գործընթացի վրա, դեռևս վաղ է ասել։

Տաթևիկ Ղազարյան