ԵՄ-ն համարում է, որ Ալիևն ու Փաշինյանը համաձայնության են եկել խաղաղության հարցում
ՎԵՐԼՈՒԾՈՒԹՅՈՒՆՆԵՐ
Ng.ru-ն գրում է, որ Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի բանակցությունները կշարունակվեն Քիշնևում հունիսի 1-ին։ Նաև Մայիսի 14-ին Բրյուսելում կայացած բանակցություններին մասնակցած Եվրոպական խորհրդի ղեկավար Շառլ Միշելը հայտնել է, որ Ալիևին և Փաշինյանին հրավիրում է բանակցությունների Իսպանիայի Գրանադա քաղաքում, որտեղ հոկտեմբերին կայանալու է Եվրոպական քաղաքական հանրության գագաթնաժողովը։ Այսպիսով, հավանաբար, առնվազն մինչև հոկտեմբեր Հայաստանի և Ադրբեջանի միջև խաղաղության պայմանագիր չի ստորագրվի։
Արևմտյան քաղաքական գործիչները բավականին բարձր են գնահատում Բրյուսելում Իլհամ Ալիևի և Նիկոլ Փաշինյանի հանդիպումը։ Մասնավորապես, ՆԱՏՕ-ի գլխավոր քարտուղարի Կովկասի և Կենտրոնական Ասիայի հարցերով խորհրդական Խավիեր Կոլոմինան ասել է, որ Ալիև-Փաշինյան հինգերորդ հանդիպումը հուսադրող է ստացվել։ «ՆԱՏՕ-ն աջակցում է Հայաստանի և Ադրբեջանի միջև հարաբերությունների կարգավորմանը»,- ասել է Կոլոմինան։
Հիմնական բանը, ինչի շուրջ Ալիևն ու Փաշինյանը կարողացել են պայմանավորվել, դա, ինչպես Շառլ Միշելն է ասել, իրենց երկրների փաստացի փոխճանաչումն է այն սահմաններում, որոնք նրանք ունեին Խորհրդային Միությունում։ «Սահմանի վերջնական սահմանազատումը կհամաձայնեցվի բանակցությունների ընթացքում»,- ասել է Եվրոպական խորհրդի ղեկավարը։
Նրա խոսքով, անհրաժեշտ է պահպանել ձեռք բերված տեմպը Բաքվի և Երևանի միջև համապարփակ խաղաղության համաձայնագրի ստորագրման ուղղությամբ քայլեր ձեռնարկելու համար։ «Ալիևն ու Փաշինյանը պայմանավորվել են վերսկսել երկկողմ հանդիպումները սահմանային հարցերի շուրջ», - ասել է Շառլ Միշելը, ընդգծելով, որ կողմերը իրական առաջընթաց են գրանցել տարածաշրջանում տրանսպորտային և տնտեսական կապերի ապաշրջափակման հարցում։
«Այդ հարցում դիրքորոշումները շատ մոտ են միմյանց։ Մասնավորապես Նախիջեւանի հետ և նրա միջով երկաթուղային հաղորդակցության վերականգնման հետ կապված։ Համապատասխան թիմերին հանձնարարվել է վերջնական տեսքի բերել համաձայնագիրը երկաթուղային կապի բացման, կոնկրետ ժամանակացույցով անհրաժեշտ շինարարական աշխատանքների իրականացման համատեքստում։ Նրանք նաև համաձայնել են ստանալ Համաշխարհային մաքսային կազմակերպության աջակցությունն այդ աշխատանքն իրականացնելու համար», - ասել է Շառլ Միշելը:
Նա նաև ընդգծել է, որ ԵՄ-ն գաղտնի ծրագրեր չունի, և միակ նպատակն է օգնել Հայաստանին և Ադրբեջանին հասնել արդար խաղաղության։ «Կարծում եմ, որ կարևոր է զերծ մնալ թշնամական հռետորաբանությունից, գործել ազնվությամբ և առաջնորդություն ցուցաբերել փոխադարձ ընդունելի լուծումների հասնելու համար», - ասվում է Միշելի պաշտոնական հայտարարության մեջ: Փաստաթղթում ասվում է, որ Ալիևի և Փաշինյանի հաջորդ հանդիպումը տեղի կունենա հունիսի 1-ին Քիշնևում Ֆրանսիայի նախագահ Էմանուել Մակրոնի և Գերմանիայի կանցլեր Օլաֆ Շոլցի մասնակցությամբ, իսկ հոկտեմբերին Գրանադայում։
Սակայն Միշելի լավատեսական գնահատականները չեն համապատասխանում հայ-ադրբեջանական սահմանագոտում տիրող ծանր իրավիճակին։ Այժմ Գեղարքունիքի մարզում համեմատաբար հանգիստ է, սակայն օրեր առաջ կողմերը ականանետերից կրակել են միմյանց վրա։ Ըստ որոշ տեղեկությունների նաև օգտագործվել են անօդաչու սարքեր։ Երկու կողմերն էլ հայտնել են մի քանի զինծառայողների վիրավորումների և մահվան դեպքերի մասին։ Հայկական կողմից տեղական աղբյուրների փոխանցմամբ ներկայումս կրակոցներ չկան, սակայն ամբողջությամբ զգացվում է լարվածություն։
Բաքուն դեռ չի մեկնաբանել Բրյուսելում Ալիևի և Փաշինյանի բանակցությունները։ Այնտեղ կարծես թե ավելի զբաղված են Թուրքիայի նախագահական ընտրություններով։
Իսկ Երևանում Փաշինյանին հերթական անգամ մեղադրել են ազգային շահերը դավաճանելու մեջ։ Ընդդիմությունը պնդում է, որ ճանաչելով Ադրբեջանը նախկին Ադրբեջանական ԽՍՀ սահմաններով Փաշինյանը Լեռնային Ղարաբաղն անվանել է ադրբեջանական պետության մաս։ Հայաստանի Հանրապետական կուսակցության (նախկին իշխող կուսակցության) ներկայացուցիչ Արմեն Աշոտյանը բրյուսելյան բանակցությունների արդյունքները հայկական կողմի համար ձախողված է համարել. «Փաշինյանը Հայաստանի անունից Լեռնային Ղարաբաղը ճանաչեց որպես Ադրբեջանի մաս։ Փաստորեն, Բրյուսելում նա հերթական անգամ հանձնեց Արցախը»։
Նյութը հրապարակման պատրաստեց Կամո Խաչիկյանը
