Ստարոդուբցևը կարծում է, որ Բաքուն երես չի թեքի Անկարայից անգամ Երևանի հետ հաշտեցման պայմաններում
ՎԵՐԼՈՒԾՈՒԹՅՈՒՆՆԵՐ
Sm.news-ը գրում է, որ Թուրքիայի հարցերով փորձագետ, սյունակագիր, բլոգեր Իվան Ստարոդուբցևը կարծում է, որ եթե Նիկոլ Փաշինյանը և Իլհամ Ալիևը կարողանան կարգավորել հարաբերությունները երկու երկրների միջև, ապա Հայաստանի և Ադրբեջանի միջև խաղաղության համաձայնագիրը կնվազեցնի Թուրքիայի դերը Անդրկովկասում։
«Եթե համաձայնագիր ստորագրվի, բնականաբար, Թուրքիայի դերն այդ գործընթացում կնվազի։ Բայց չմոռանանք, ի վերջո, կա ևս մեկ բան, և դա Ադրբեջանի և Թուրքիայի միջև կնքված Շուշայի գործարքն է, որը նրանց դաշինքը վերածում է ռազմաքաղաքական միության։ Ուստի Ադրբեջանը միշտ իր կողքին է պահելու Թուրքիային, անկախ իրադարձությունների զարգացումից»,- ասել է Ստարոդուբցևը։
Դիտորդը ռազմաքաղաքական դաշտում երկու երկրների համագործակցությունը համարում է յուրօրինակ կայուն, արդիական ոչ միայն կարճաժամկետ, այլ նաև միջնաժամկետ հեռանկարում։
«Դա կլինի փոխադարձ: Բայց չմոռանանք, որ ժամանակին Թուրքիան հրաժարվեց հաշտվել Հայաստանի հետ հենց Ադրբեջանի ու Լեռնային Ղարաբաղի պատճառով։ Ադրբեջանում ոչ ոք չի մոռացել թուրքերին: Ժամանակին Թուրքիային իր միջազգային դիրքի տեսակետից, ավելի ձեռնտու էր Հայաստանի հետ հաշտություն կնքել, բայց նրանք այլ ռազմավարական որոշում կայացրին։ Ուստի, նման իրավիճակում, երբ Թուրքիայի դերը կարծես թե անկում է ապրում, և նա «արդեն պետք չէ», Ադրբեջանը նրանից երես չի թեքելու»,- շեշտել է վերլուծաբանը։
Նյութը հրապարակման պատրաստեց Կամո Խաչիկյանը
