Թուրքիան մտնում է տուրբուլենտության երկշաբաթյա փուլ

Թուրքիայում երեկ կայացած խորհրդարանական ընտրությունները այդպես էլ երկրի նոր նախագահի անունը հայտնի չեն դարձրել, տեղի կունենա երկրորդ փուլ։

Ընտրությունների ահռելի մասնակցությունը՝ շուրջ 85 %, ինչպես նաև առանձին միջադեպերի, լայն ընտրակեղծիքների մասին տեղեկությունները վկայում են, որ Էրդողանը մեծապես փորձել է ընտրվել կեղծիքների միջոցով, ավելին ընտրատեղամասերը փակվելուց և հաշվարկներ սկսելուց կարճ ժամանակ հետո հայտարարեցին, թե Թուրքիայի գործող նախագահը շուրջ 60 % քվե է ստացել, իհարկե հաշվարկներին և ընդդիմության բողոքի գործողություններին զուգահեռ նրա տոկոսը սկսեց իջնել և արդեն կեսգիշերին մոտ նվազել էր 50%-ից։

Թերթիկների հաշվարկի արդյունքում, ընդդիմության առաջնորդ Քըլըչդարօղլուն ստացել է 45 տոկոս, 5,3% էլ ստացել է ազգայնական գործիչ Սինան Օղանը, և դեռևս հարց է, թե երկրորդ փուլում ում կգնան այս ձայները։ Նույնիսկ եթե Քըլըչդարօղլուն ընտրվի Թուրքիայի նախագահ, ապա լրջագույն խնդիրների է բախվելու, քանի որ Թուրքիայի 600 հոգանոց խորհրդարանում 322 պատգամավորները լինելու են Էրդողանի կողմնակիցները։

Առաջիկա 2 շաբաթները քաղաքական տուրբուլենտության և անորոշության փուլ են կանխորոշում Թուրքիայի համար։ Էրդողանը փորձելու է ամեն գնով պահպանել իր իշխանությունը, իսկ Քըլըչդարօղլուն, հատկապես Արևմուտքի աջակցութամբ, փորձելու է գահընկեց անել նրան և, հաշվի առնելով 2 կողմերի վճռականությունը, Թուրքիայում քաղաքական գործընթացները, շոշափելի ազդեցություն են ունենալու ոչ միայն այդ երկրի, այլ նաև ողջ տարածաշրջանի, այդ թվում՝ Հայաստանի Հանրապետության վրա։

Մանե Անտոնյան