Սամվել Բաբայանը սրում է իրավիճակն Արցախում

Արցախի Անվտանգության խորհրդի նախկին քարտուղար Սամվել Բաբայանը բացահայտ սպառնալիքներ է տեղում Արցախի իշխանությունների, նախկին պետնախարար Ռուբեն Վարդանյանի հասցեին, և պահանջում է իրեն հանձնել պետնախարարի պաշտոնը։

Բաբայանն այսօր հանրահավաք է հրավիրել, որտեղ էլ փորձել է ճնշման միջոցով հասնել իր պահանջների կատարմանը։ Նա նաև հարցազրույց է տվել և սպառնացել, որ համարժեք պատասխան կտա բոլոր այն պաշտոնյաներին, ուժային նախարարությունների ղեկավարներին, որոնք կփորձեն խափանել հանրահավաքը։ Նրա այս ձեռնարկը, ի դեպ, պատասխանն է օրեր առաջ Ռուբեն Վարդանյանի հրավիրած բազմահազարանոց հանրահավաքին։

Ստեփանակերտում Ռուբեն Վարդանյանը պնդել էր, որ բացառվում է Ադրբեջանի հետ ինտեգրման հնարավորությունը, իսկ Բաբայանը հանդես է գալիս Ադրբեջանի հետ առավել մեղմ դիրքորոշումներով, ընդհուպ՝ ադրբեջանցի գործարարներին Արցախ հրավիրելով, հանքավայրերի շահագործման հարցում Ադրբեջանի իշխանությունների հետ համագործակցելով։

Արցախում այսօր էլ համառ լուրեր են շրջանառվում, որ Նիկոլ Փաշինյանը հատուկ է Բաբայանին ուղարկել Ստեփանակերտ՝ իշխանությունը Արայիկ Հարությունյանից խլելու, Արցախն Ադրբեջանին փոխանցումը սահուն իրականացնելու համար։ Փաշինյանի ճնշմամբ Արցախի նախագահը մի անհեթեթ խորհրդատվական մարմին էր ստեղծել, որի ղեկավար էր նշանակել ՀՀ վարչախմբի հետ սերտ կապեր պահպանող Տիգրան Պետրոսյանին, իսկ Սամվել Բաբայանն էլ «մատյան գունդն» է, որը ապահովելու է արցախցիների ձեռքով Արցախը Ադրբեջանին փոխանցելը։ Դրանից հետո Փաշինյանը կհայտարարի, թե ինքը ոչինչ չէր կարող անել, որոշումը Ստեփանակերտինն է եղել։ 

Մանուկ Մխիթարյան