Ինչու էր Փաշինյանը Մոսկվայում շքերթին ներկա, իսկ Ալիևը ոչ
ՎԵՐԼՈՒԾՈՒԹՅՈՒՆՆԵՐ
Tsargrad.tv-ն գրում է, որ մայիսի 9-ին, ողջ աշխարհում նշվեց Հաղթանակի 78-րդ տարեդարձը։ ԱՊՀ երկրների բազմաթիվ առաջնորդներ ժամանել էին ի պատիվ նացիստական զավթիչներից մարդկության ազատագրման մոսկովյան շքերթին: Ներկա էր նաև Հայաստանի վարչապետ Նիկոլ Փաշինյանը։ Բայց Իլհամ Ալիևը չէր ժամանել, թեև, ինչպես հաղորդվել էր Վլադիմիր Պուտինի հրավերից հետո Ալեքսանդր Լուկաշենկոն էլ էր նրան խնդրել ներկա լինել։ Բայց Ադրբեջանի նախագահը հրաժարվել էր, ահա այսպիսի «բարեկամ երկիր»:
ԱՊՀ հարցերով Պետդումայի հանձնաժողովի նախագահի առաջին տեղակալ Կոնստանտին Զատուլինը բացատրել է Ալիևի Մոսկվայում Հաղթանակի շքերթին չմասնակցելը։ «ԱՊՀ-ի Ռուսաստանի դաշնակիցներից յուրաքանչյուրին հակառակորդը բառացիորեն առաջարկում է հակառուսական ճակատ ստեղծել, և Ադրբեջանն ավելի մոտ է նման որոշմանը, քան, ասենք, Ղազախստանը, Ղրղզստանը, Ուզբեկստանը»,- ասել է Զատուլինը։
Պատգամավորը նաև կարծում է, որ Իլհամ Ալիևը, եթե անգամ Ռուսաստանն իսկապես ուզում է հակառակին հավատալ, վաղուց է մտել այլ ուժերի ուղեծիր։ Եվ խոսքը ոչ միայն Թուրքիայի մասին է, դա արդեն ակնհայտ է, այլ նաև Արևմուտքի։ Այդ իսկ պատճառով էլ Բաքուն գործողություններ է ձեռնարկում տարածաշրջանում իրավիճակն ապակայունացնելու համար, մասնավորապես, հակամարտություն է հրահրում Իրանի հետ։ Հակաիրանական սադրանքներն ավելի ու ավելի հաճախ են ի հայտ գալիս, և դա հիմնավոր պատճառներ ունի:
Փոխարենը Ալիևը ցանկանում է ստանալ «մեղքերի թողություն» Լեռնային Ղարաբաղում, կարծում է Կոնստանտին Զատուլինը։
Իսկ թե ինչու էր Փաշինյանը ժամանել Մոսկվա չնայած համակարգված իր հակառուսական հարձակումներին, պատգամավորը վստահ է, որ դա Հայաստանի վարչապետի խաղի տարր է։ Նման ժեստը, ինչպիսին է Ռուսաստան այցը, ըստ Փաշինյանի, կկարողանա փոխհատուցել Ռուսաստանի դեմ ուղղված իր նախկին օդիոզ հայտարարությունները, իր և Հայաստանի իշխանական պատգամավորների գործողությունները։
Նյութը հրապարակման պատրաստեց Կամո Խաչիկյանը
