Փաշինյանը հիմա էլ Սփյուռքին է մեղավոր կարգում. Լպիրշության նոր գագաթնակետ

44-օրյա պատերազմի ընթացքում ՀՀ վարչապետի պաշտոնը զբաղեցնող անձը ուղիղ եթերում հայտարարում էր, թե Սփյուռքում հայրենասիրության կաթսան եռում է, ավելին հայաստանցիներին էր մեղադրում ոչ բավարար հայրենասեր լինելու մեջ՝ որպես օրինակ բերելով Սփյուռքը։

Իրավիճակն այժմ արմատապես փոխվել է, սփյուռքահայերն էլ, ինչպես հայ զինվորականությունը և հասարակության այլ հայրենասեր շերտեր, Նիկոլ Փաշինյանի համար դարձել են 44-օրյա պատերազմում կրած պարտության մեղավորներ։ Ընդհանրապես Փաշինյանի ցինիզմն այլևս վաղուց սահմաններ չի ճանաչում և նա շարունակում է հոխորտալ, բոլորին մեղադրել, բոլորին մեղավոր կարգել, միայն թե կարողանա պահպանել սեփական իշխանությունը, ինչպես նաև լկտիաբար պատասխանի մարդկանց մեղադրանքներին։

Չեխիա կատարած նրա պաշտոնական այցը երեկ ամփոփվել է հայ համայնքի հետ հանդիպումով։ Ինչպես և սպասելի էր, հանդիպումը բոլորովին էլ հարթ չի անցել։ Համայնքի հավաքված ներկայացուցիչները Փաշինյանին պարզ և հստակ մեղադրել են 44-օրյա պատերազմում երկիրը պարտության տանելու, Արցախն էլ հանձնելու մեջ։ Ամոթի որևէ զգացում ունեցող մարդը նման մեղադրանքներից հետո գլուխը կախ կհեռանար, սակայն ոչ՝ Փաշինյանը։ Նա վաղուց ապացուցել է, որ որևէ ամոթ չի զգում իր արածի համար։ Ավելին չեխաբնակ հայ նկարչին՝ ծագումով Արցախից, Փաշինյանը հայտարարել է. «Հենց Դուք եք զիջում Արցախը, հողը Դուք եք հանձնել, որ հաղթանակած հողը թողել եք և եկել եք երջանիկ կյանքով ապրում եք Պրահայում։ Դուք ձեր հեռանալով այդ հողը հանձնել եք, որովհետև հողը Ձեզ համար է»,- հայտարարել է Փաշինյանը, իսկ երբ Սփյուռքում բնակվող նկարիչը վարչապետին հիշեցրել է, որ 250 հազար դոլարից ավել օգնություն է ուղարկել Հայաստանին, Փաշինյանը պարզապես պատասխանել է. «-Եվ ի՞նչ է տվել այդ 250 հազար դոլարը, մենք՝ պետությանը պետք է դադարենք վերաբերվել որպես որբանոցի, 250 հազարով օգնել եք, պետությանը պետք է օգնել հարկեր վճարելով և հարկեր գեներացնելով»։

Նիկոլ Փաշինյանը, որը իշխանափոխությունից հետո Սփյուռքին կոչ էր անում գումարներ փոխանցել Հայաստան համահայկական հիմնադրամին և օգնել, այսօր, թերևս, Սփյուռքի օգնության կարիքը չունի։ Նա կորցրել է չափը և պատրաստ է յուրաքանչյուրին մեղադրել բոլոր հնարավոր մեղքերի մեջ, ընդհուպ նա երեկ մեղադրանքներ է հասցեագրել Իոսիֆ Ստալինին, խեղաթյուրել պատմական փաստերը։

Գայանե Վարդանյան