Թուրքերի թիրախում Խաչատուր Սուքիասյանն է

Թուրքական իշխանությունները շարունակում են փակ պահել իրենց երկիրը հայկական ավիաընկերությունների հետ կապված։

Վերջին օրերին մի շարք առաջատար պաշտոնյաներ դատապարտել են Հայաստանին՝ Երևանում «Նեմեսիս» գործողությանը նվիրված հուշարձան տեղադրելու համար, և «FlyOne Armenia» ավիաընկերության թռիչքների մերժումը պայմանավորել է դրանով։ Արտգործնախարար Մեվլութ Չավուշօղլուն, Իբրահիմ Քալընը նախօրեին էին խոսել, իսկ երեկ համապատասխան հայտարարություն արել Թուրքիայի նախագահի աշխատակազմը, ինչպես նաև խորհրդարանի նախագահ Մուսթաֆա Շենթոփը Ալեն Սիմոնյանի հետ։

Բնականաբար հասկանալի է, որ կոնկրետ մեկ հուշարձանի բացումը վկայաբերելը ընդամենը տարրական «ատմազկա» է , Թուրքիան այն երկիրը չէ, որ մի չնչին դետալի համար նման աղմուկ բարձրացնի, անգամ ցեղասպանության միջազգային ճանաչման գործընթացը նման ուշադրության չի արժանացել թուրքական իշխանությունների կողմից, նույնիսկ, երբ գերտերությունները ճանաչում էին Հայոց ցեղասպանության փաստը։

Ըստ էության թուրքերը գլոբալ աշխարհաքաղաքական խնդիր են լուծում, իսկ Հայաստանում դրա առաջին և հիմնական հարվածը Խաչատուր Սուքիասյանին է բաժին հասնում, որին էլ և պատկանում է «FlyOne» ավիաընկերությունը։ Սուքիասյանը համարվում է այս իշխանության կապող օղակը թուրքական կապիտալի հետ, ինչպես նաև անձամբ, մշտապես լոբբինգ է անում Թուրքիայի հետ հարաբերությունները կարգավորելու, տնտեսական կապերը սերտացնելու օգտին, իսկ այժմ նա չի կարողանում նույնիսկ բացատրել իր նեղ թիմին, որ Թուրքիայի հետ հարաբերությունները բարելավելու հարցում իմիջային լրջագույն կորուստներ ունեցավ, սակայն հիմնական հարվածը ստացավ իրեն պատկանող ընկերությունը։

Ըստ որոշ արևմտյան տարբերակների՝ թիրախավորված հարված է եղել հենց Սուքիասյանին, թուրքական կողմը նրան բռնացրել է կրկնակի խաղերի մեջ։ Ըստ մեր աղբյուրի՝ թուրքերը խանդով են վերաբերվում Խաչատուր Սուքիասյանի որոշ խոշոր նախագծերի հանդեպ, որոնք կապված են հնդկական կողմի հետ։ Վերջին շրջանում հայ-հնդկական հարաբերությունների ակտիվացումը ոչ միայն ռազմաարդյունաբերության և սպառազինության գնումների ուղղությամբ է, այլ նաև մի շարք տնտեսական և ֆինանսական խոշոր նախագծեր են իրականացվում, ինչը խանդ է առաջացրել արևմտյան երկրների՝ այդ թվում նաև Թուրքիայի հետ։

Բանն այն է, որ Արևմուտքն ինքն էլ խնդիրներ ունի այսօրվա Հնդկաստանի հետ՝ համարելով, որ այդ երկիրը այլ ռազմաքաղաքական ալիանսի, թեկուզ ծպտյալ մասնակից է, Իրան-Հնդկաստան-Չինաստան գծի մեջ է։ Պարզ է, որ թուրքերը ճնշումն օգտագործում են նաև ներկայումս ընթացող բանակցային գործընթացում ֆոն ապահովելու համար, սակայն, ըստ էության, աշխարհաքաղաքական հարցերը չէին ստորադասի Երևանում մի հուշարձանի բացմանը։ Խաղն իրականում ավելի բազմաշերտ և ավելի լայն է։

Իրինա Անտոնյան