Վարչախմբի վարկանիշը շեշտակի նվազել է. Արձանագրել են ամերիկացիները

Միջազգային հանրապետական ինստիտուտը հրապարակել է իր վերջին հարցման արդյունքները, որն իրականացվել էր մարտին և ցուցանիշները գրեթե ողբերգական են Նիկոլ Փաշինյանի իշխանության համար։

Եթե 2018 թվականի օգոստոսին հարցվածների 72 տոկոսն էր կարծում, որ Հայաստանը շարժվում է ճիշտ ուղղությամբ, ապա այս տարի արդեն ընդամենը 36 տոկոսը, և 52 տոկոսը 5 տարի առաջվա 14 տոկոսի համեմատ կարծում է, թե Հայաստանը շարժվում է սխալ ուղղությամբ։

Չափազանց ծանր վիճակ է ժողովրդավարության առումով։ Ընդամենը 17 տոկոսն է բավարարված ժողովրդավարության զարգացման ընթացքով 35 տոկոսը ոչինչ, ոչ մի փոփոխություն չի արձանագրել Հայաստանում։ Հարցվածների 44 տոկոսը ամենահիմնական խնդիրը նշել է ազգային անվտանգության և սահմանային իրավիճակը, ընդ որում ևս 16 տոկոսը այդ ցուցանիշը նշել են որպես երկրորդ և երրորդ նշում։

Զգալիորեն նվազել է Նիկոլ Փաշինյանի անձնական վարկանիշը, այս պահին դա կազմում է 14 տոկոս, երկրորդ տեղում Արարատ Միրզոյանն է 3 տոկոսով, իսկ երրորդ տեղում Ռոբերտ Քոչարյանն ու Արամ Սարգսյանը` 2-ական տոկոսով։

Հարցվածների 64 տոկոսը որևէ քաղաքական գործչի չի վստահում։ «Քաղաքացիական պայմանագիր» կուսակցության վարկանիշը կազմում է ընդամենը 21 տոկոս, «Հայաստան» դաշինքի, «Բարգավաճ Հայաստան», «Հանրային ձայն» կուսակցությունների, «Հայ հեղափոխական դաշնակցության» ցուցանիշները շատ ավելի համեստ են, իսկ հարցվածների 12 տոկոսը նշել է, թե կփչացնի քվեաթերթիկը, եթե խորհրդարանական ընտրություններն անց կացվեն հաջորդ կիրակի։ Եվս 30 տոկոսը մտադիր չէ մասնակցել քվեարկությանը։

Ամենավատթար գնահատականին արժանացել են վարչապետի աշխատակազմը՝ 5 տարվա ընթացքում 82 տոկոսից մինչև 38 տոկոսի անկում, և զինված ուժերը՝ 74 տոկոսից հասնելով 40 տոկոսի, 59 տոկոսն ընդհանրապես բավարար չէ զինված ուժերի աշխատանքով։

Գրեթե բոլոր առումներով լրջագույն խնդիրներ են արձանագրվում, ինչը փաստում է, որ այսպես կոչված հեղափոխությունից հետո Նիկոլ Փաշինյանը ձախողել է բոլոր ուղղություններով։ 

Արմինե Հակոբջանյան