Թուրքիայում իրավիճակը թեժանում է, ինչը կարող է լուրջ հետևանքներ ունենալ

Թուրքիայում իրավիճակը թեժանում է, ինչը կարող է լուրջ հետևանքներ ունենալ նաև տարածաշրջանի՝ մասնավորապես Հայաստանի վրա։ Թեև վերջին շրջանում սոցիոլոգիական տարբեր հարցումներ վկայում են, որ ընդդիմադիր «Ժողովրդահանրապետական» կուսակցության կողմից առաջադրված նախագահի թեկնածու Քեմալ Քըլըչդարողլուն բավականին առաջ է գործող նախագահ Էրդողանից, վերջինս բնավ էլ մտադիր չէ ընկրկել, ավելին օրեր առաջ առողջական վատթարացումից հետո Էրդողանն արդեն բավականին առույգ տեսքով բազմահազարանոց հանրահավաք է անցկացրել Անկարայում, հայտարարել, թե իրենք ջախջախելու են ընդդիմությանը և լուրջ հարված են հասցնելու։

Գրեթե նույնպիսի ահռելի մեծ հանրահավաք է անցկացրել Իզմիրում Քեմալ Քըլըչդարօղլուն, որը հատկապես շեշտել է ժողովրդավարության և Թուրքիային Եվրամիության անդամակցելու բանակցությունները անհապաղ սկսելու իր մտադրության մասին։

Վերլուծաբանները վստահ են, թե ընտրության առաջատար չկա, որը կկարողանա հավաքել ձայներ   50 %-ից ավելին և մայիսի 14-ի ընտրություններից հետո, մեծ հավանականությամբ, տեղի կունենա երկրորդ փուլ։ Ի դեպ անիշխանության այդ երկշաբաթյա ժամկետն արդեն իսկ լուրջ վտանգներ է պարունակում ողջ տարածաշրջանի համար։ Ըստ էության, կախված ստացած ձայների քանակից, Թուրքիան մտնելու է երկուշաբաթ տևող տուրբուլենտության փուլ, որի ժամանակ էլ չի կարողանալու քաղաքական հակակշիռներ իրացնել տարածաշրջանի համար։ Դա հետևանքներ կունենա ինչպես Ռուսաստանի համար Ուկրաինայում, այնպես էլ Հայաստանի համար։ Չի բացառվում, որ Ադրբեջանը այդ ընթացքն օգտագործի Հայաստանի դեմ նոր էսկալացիա անելու։

Ի դեպ Էրդողանն արդեն իսկ սկսել է բավականին հետաքրքիր քարոզչական հնարքներ իրականացնել։ Էրդողանը հայտարարել է, թե Թուրքիայի Ազգային հետախուզական ծառայությունը Սիրիայում հատուկ գործողություն է իրականացրել՝ ոչնչացնելով Իսլամական պետության ահաբեկչական խմբավորման պարագլուխներից մեկին՝ Աբու Հուսեին ալ Կորեյշիին։ Թեպետ գործողության հստակ օրը չի նշվում, սակայն չի բացառվում, որ դա տեղի է ունեցել առնվազն մեկ ամիս առաջ։ Թե ինչո՞ւ է միայն ընտրություններից օրեր առաջ Էրդողանը հայտարարում այդ մասին հանրությանը, բնավ կարիք չկա պարզաբանելու։ Սա քարոզչական տրյուկ է, որպեսզի Թուրքերին կարողանա համախմբել անվտանգության հարցերի շուրջ, նաև համոզի, թե միայն ինքը կարող է ապահովի Թուրքիայի իրական անվտանգությունը։

Սիրան Անանյան