Մանե Թանդիլյանը փաստում է՝ «Քաղաքացիական պայմանագրի» վարկանիշը Երևանում շրիշակից ցածր է

«Քաղաքացիական պայմանագրի» վարկանիշը Երևանում շրիշակից ցածր է, ցույց են տվել «Ապրելու երկիր» կուսակցության հարցումները։

Կուսակցության նախագահ Մանե Թանդիլյանը նշում է, թե Երևանի ընտրությունները պետք է օրվա իշխանություններին անվստահության հանրաքվեի վերածել։ «Հանուն Հայաստանի զարգացման, հանուն Երևանի համայն հայության կենտրոն դառնալու, երևանցին պիտի փոխի այսօրվա իշխանությանը հենց Երևանում։ Որոշ մարզերում արդեն արել են, դա հնարավոր է, եթե մարդկանց ներկայացնում ես զարգացման հստակ առաջարկ, Երևանում ևս այդ առաջարկն անելու ենք»,- նշել է նա։

Կուսակցությունն այժմ միակն է, որ պնդում է պահպանել օրենքի տառը և Երևանի ավագանու արտահերթ ընտրություններ անցկացնել, ինչը, իհարկե, չի բխում գործող վարչախմբի շահերից։ Ցածր վարկանիշի պայմաններում ՔՊ-ն գիտակցում է, որ խայտառակ պարտություն է կրելու։ Թեև Մանե Թանդիլյանը վստահ է, որ կառավարությունը, իշխող ուժը չեն ցանկանում Երևանի արտահերթ ընտրություններ և ամեն ինչ անելու են իրենց ցանկացած սցենարը կյանքի կոչելու համար։ «Այս պահանջն առաջ քաշելու նպատակն իշխանություններին «ի շրջանս յուր» վերադարձնելն է՝ օրենքի դաշտում պահելը։ Իրավական դաշտում գործելը բխում է իրենց շահերից։ Ի վերջո, կան չգրված կանոններ, օրինակ, «բումերանգի էֆեկտը»։ Վաղը, երբ արդեն իշխանություն չեն ունենա, իրենք ի՞նչ կցանկանան՝ օրե՞նքը գործի իրենց նկատմամբ, թե՞ օրվա իշխանության քաղաքական նախասիրությունը։ Այնպես որ, իրենց շահերից է բխում օրենքով գործելը»,- նշել է Մանե Թանդիլյանը։

Ուստի, այժմ «Ապրելու երկիրը» սպասում է կառավարության քայլերին՝ ողջամիտ ժամկետում օրենքով նախատեսված պարտավորությունների բացակայության, կառավարության անգործության դեպքում դիմելու են դատարան և հետամուտ են լինելու, որ արդարություն հաստատվի։

Երևանը պետք է ունենա օրինական ճանապարհով ընտրված օրինական իշխանություն։ Միևնույն ժամանակ, ըստ «Ապրելու երկրի» նախագահի, թե՛ արտահերթ, թե՛ հերթական ընտրություններում մեծ շանսեր ունեն հաղթելու ՔՊ-ին։ Իշխանազրկելու են, ինչպես իշխանազրկեցին Ալավերդիում, Նոյեմբերյանում, այլ համայնքներում։ 

Նունե Մուսայելյան