Փաշինյանը Հայոց ցեղասպանության նոր մեղավոր է գտել. մաքրում է թուրքերին
ՎԵՐԼՈՒԾՈՒԹՅՈՒՆՆԵՐ
Հայոց ցեղասպանության 108-րդ տարելիցի միջոցառումներն ու իշխանական լրատվամիջոցների կողմից տարածվող թեզերը վկայում են, որ այս անգամ Փաշինյանը որոշել էր ցեղասպանության մեղքից մաքրել թուրքերին և մեղադրանքի բոլոր սլաքներն ուղղել Ռուսաստանի ուղղությամբ, ընդ որում նրա այս կեղտոտ քարոզչությունը արձանագրել էին նույնիսկ ռուսական փորձագիտական շրջանակներն ու լրատվամիջոցները՝ ընդգծելով, որ Փաշինյանը հրահանգել է պրոիշխանական մամուլի և իր ֆեյքային ռեսուրսներին ցեղասպանությունը ներկայացնել որպես ռուսների կողմից հրահրված ողբերգություն։
Ամբողջ մեղքը բարդել ռուսների վրա, խմբագրել պատմությունը և փորձել տարբեր անալոգիաներով հայ հանրությանը համոզել, որ ցեղասպանության համար առաջին հեթին մեղավոր են ոչ թե այն կազմակերպող, իրականացնող թուրքերը, այլ Ռուսաստանը։ Հակառուսական հիստերիայի պայմաններում, որ տիրում է Հայաստանում, Փաշինյանի այս գործողությունները բոլորովին էլ նորություն չեն, արևմտամետ շրջանակները տևական ժամանակ հենց այս քարոզչությունն էլ իրականացնում են, ուստի և Փաշինյանը ևս տուրք է տալիս այդ պրոպագանդային՝ օգտագործելով նաև Արցախում ռուս խաղաղապահների չափազանց պասիվ քայլերը, սեփական պարտականությունները չկատարելը, ինչը զգալի հակառուսական ալիք է բարձրացրել Հայաստանում։
Այն, որ այս քարոզչությունը վերջնարդյունքում լրջագույն խնդիրներ է հարուցելու, ընդհուպ մինչև հայ-ռուսական հարաբերությունների խիստ վատթարացումը, կարծես որևէ կերպ չի մտահոգում Նիկոլ Փաշինյանին, իսկ ում էլ մտահոգում է, չունեն համապատասխան ռեսուրսներ դրա դեմն առնելու համար։ Ռուսական կողմն ինքն էլ առայժմ արձանագրումներից բացի այն կողմ չի անցել և գործուն քայլեր չի ձեռնարկում Հայաստանում Ռուսաստանի նկատմամբ վերաբերմունքը փոխելու ուղղությամբ, ինչը լրջագույն հետևանքներ է ունենալու թե՛ Հայաստանի և թե՛ Ռուսաստանի համար։
Նունե Երեմյան
