Երկակի ստանդարտներն ու «Քաղպայմանագրի» երեսպաշտությունը
ՎԵՐԼՈՒԾՈՒԹՅՈՒՆՆԵՐ
2018 թվականի «հեղափոխությունից» հետո Նիկոլ Փաշինյանը գրեթե ամենշաբաթյա ռեժիմով խոսել է օրենքի գերակայության, օրենքի առջև բոլորի հավասարության մասին։
Փաստացի 5 տարի անց ունենք մի իրավիճակ, երբ Հայասատնի գործող իշխանությունները գերազանցել են բոլոր նախորդների օրենքի խախտումներով, իսկ սեփական կուսակիցների և կողմնակիցների դեմ նույնիսկ ամենաաղաղակող կոռուպցիոն բացահայտումները կոծկվել են։
Գլխավոր դատախազությունը երեկ հայտարարել է, թե ուսումնասիրել են հակակոռուպցիոն կոմիտեի նախագահ Սասուն Խաչատրյանի կողմից զգալի ցածր գնով բնակարան ձեռք բերելու առնչությամբ հրապարակումը, սակայն դրան ընթացք չի տրվել։
Հիշեցնենք՝ Խաչատրյանը, ըստ մամուլի, 2021 թվականի փետրվարին ընդարձակ բնակարան էր ձեռք բերել Երևանի կենտրոնում կառուցվող «Բյուրեղ» բնակելի թաղամասում, իր հարևանների համեմատությամբ էականորեն ավելի ցածր գնով։ Տևական ժամանակ առաջ էլ տեղեկություն հայտնվեց, որ բավականին ընդարձակ մի բնակարան էլ Պաշտպանության նախարար Սուրեն Պապիկյաննն է գնել։
Եթե Պապիկյանի դեպքում «Քաղպայմանագիրը» որոշ փաստաթղթեր է ներկայացրել իբր այդ ընթացքում Պապիկյանի տան արժեքը հավասար է իր հարևաների գնած տան արժեքին, ապա Սասուն Խաչատրյանի մասով որևէ պարզաբանում ուղղակի չկա։ Հակակոռուպցիոն կոմիտեի նախագահն էլ ի պաշտոնե կոռուպցիայով զբաղվելու ավելի մեծ հնարավորություններ ունի, քան ցանկացած ոք Հայաստանի տարածքում և տրամաբանական կլիներ, որ օրենքի գերակայությունից ճամարտակող իշխանությունները առնվազն քրեական գործ հարուցեին և ուսումնասիրեին փաստերը, բացարձակապես։
Քննչական կոմիտեն էլ որոշել է վարույթ չհարուցել «Իրազեկ քաղաքացիների միավորման» հաղորդման առթիվ, ապրիլի 3-ին ԱԺ նախագահ Ալեն Սիմոնյանի կողմից քաղաքացու դեմքին ենթադրաբար թքելու միջադեպով։ Կազմակերպությունն ակնկալում էր, որ խուլիգանության հոդվածով վարույթ կսկսվի, սակայն այս դեպքում էլ իրավապահ համակարգը կոծկել է բոլորի աչքի առաջ տեղի ունեցած իրողությունը, իսկ ցանկացած, նույնիսկ ամենաաննշան հանցանքի համար, փաշինյանական իշխանության հակառակորդներին ոչ միայն բռնությունների են ենթարկում, այլ նաև կալանավորում, ինչը վերջնականապես ապացուցում է, որ Հայաստանը վերածվել է ոստիկանական բռնապետության և անօրինությունների թատերաբեմի։
Մինաս Ավագյան
