Փաշինյանի իշխանությունը լուրջ խնդիրներ է հայտնաբերել Սամվել Ալեքսանյանի ընկերություններում
ՎԵՐԼՈՒԾՈՒԹՅՈՒՆՆԵՐ
Փաշինյանի իշխանությունը լուրջ խնդիրներ է հայտնաբերել Սամվել Ալեքսանյանի ընկերություններում։ Ապրիլի սկզբին Պետեկամուտների կոմիտեն խուզարկություն էր իրականացրել Փաշինյանի սրտի օլիգարխ Սամվել Ալեքսանյանին պատկանող «Ալեքս տեքստիլ» ընկերությունում։ Պարզվել էր, որ ընկերության տնօրենը, աշխատակիցները և համագործակցող մեկ այլ ընկերության աշախտակից թաքցրել են հարկերը՝ 1 միլիարդ 144 միլիոն դրամի չափով։
Ավելի վաղ խուզարկություն էր իրականցվել նաև «Նոր Զովքում», համակարգիչներում հայտնաբերված տեղեկությունների շնորհիվ հայտնի էր դարձել նաև Ալեքսանյանին պատկանող «Ալեքս տեքստիլում» կատարվող ապօրինությունների մասին։ Դրանից հետո էլ առգրավել էին «Ալեքս տեքստիլի» համակարգիչները, պարզել հարկերից խուսափելու բավականին ուշագրավ և հետաքրքիր մեթոդը։
Ի դեպ, 1 միլիարդ 144 միլիոն դրամն արդեն Ալեքսանյանը նստեցրել է քննչական կոմիտեի դեպոզիտային հաշվին, քանի դեռ քննություն է ընթանում։ Մեր աղբյուրների փոխանցմամբ՝ խնդիրները միայն «Ալեքս տեքստիլում» չէ, այս ընթացքում խուզարկություններ և ստուգումներ են իրականացվում Սամվել Ալեքսանյանին պատկանող գրեթե բոլոր ձեռնարկություններում, և չափազանց ուշագրավ փաստեր են ի հայտ գալիս։
Մասնավորապես, իշխանությունները տեղեկություններ են ստացել «Աստղիկ» բժշկական կենտրոնում կատարվող ապօրինությունների մասին, որտեղ աշխատակիցներին ստիպում են արձակուրդ գնալ, համապատասխան դիմումներ գրել և արձակուրդային գումարներ ստանալ, սակայն այդ գումարները առձեռն վերադարձնել հիվանդանոցին։
Մի ձեռնարկությունում, որտեղ 2000-ից ավելի աշխատակիցներ կան, նման տեղեկատվությունը թաքցնելը գրեթե անհնար է, ուստի և Պետեկամուտների կոմիտեն բավական ուշագրավ տեղեկություններ է ստացել։
Ի դեպ, գումարների վերադարձի նման արատավոր մեթոդ գործել է նաև նախկինում, երբ իշխանության գալուց հետո Նիկոլ Փաշինյանը խոստանում էր կանխել բոլոր կոռուպցիոն դրսևորումներն ու ապօրինությունները, պայքարել ստվերի դեմ։
Ըստ էության, խնդիրը միայն Սամվել Ալեքսանյանին պատկանող ձեռնարկություններում կամ բուժկենտրոնում չէ։ Փաշինյանի թողտվությամբ գրեթե բոլոր ոլորտներում, բոլոր բիզնեսներում էլ այժմ շատ ավելի մեծ ստվեր է կուտակվել, քան նույնիսկ նախկինում էր։
Լուսինե Խաչիկյան
