Երկիր-«պռախադնոյ դվոռ»

Կապանում երեկ հայտնաբերել են երեք օր շարունակ Հայաստանի տարածքում գտնվող ադրբեջանական բանակի երկրորդ զինծառայողին՝ Հուսեին Ախլիման օղլու Ախունդովին։ Նրան գտել են Աճանան գյուղում։ Սովորական գյուղացիները նկատել են ադրբեջանցուն և բռնել ու հանձնել ոստիկաններին։

Պարզվել է նաև, որ մինչ այդ ադրբեջանցին հասցրել է մեկ սպանություն կատարել Հայաստանի տարածքում։ Երեկ երեկոյան, այն ժամանակ, երբ Նիկոլ Փաշինյանը Ազգային ժողովի ամբիոնից հայտարարում էր, թե իրենց ունեցած տեղեկություններով ադրբեջանցի երկրորդ զինծառայողը ցանկություն է հայտնել վերադառնալ Ադրբեջան և փոշմանել է իր փախուստի համար, նույն այդ ադրբեջանցին գրեթե 40 կմ խորանալով Հայաստանի տարածքում կարողացել էր ավտոմատի 6 կրակոցով սպանել Զանգեզուրի պղնձամոլիբդենային կոմբինատում որպես պահնորդ աշխատող 56-ամյա մի տղամարդու։

Երեք օր շարունակ Հայաստանի սահմանների պաշտպանությունը տապալած իշխանությունը նաև տապալել էր հասարակական անվտանգությունը, և մի ադրբեջանցի կարողացել էր իրեն անծանոթ տարածքներով գրեթե մի քանի տասնյակ կիլոմետր խորանալ Հայաստանի տարածքի մեջ։

Ի դեպ, մամուլում հայտնված տեղեկություններով, երբ հայ երիտասարդները բռնել, պինդ պատժել և փոխանցել ոստիկաններին, վերջիններս փոխանակ երիտասարդներին դրվատեն, ընդհակառակը, վիրավորել և քննադատել են։ Այս ամենը պարզապես վկայում է, որ ի դեմս փաշինյանական իշխանության և նրա կցորդ իրավապահների գործ ունենք դավաճանական մի բազմության հետ, որի համար ամենակարևոր խնդիրը Նիկոլ Փաշինյանի իշխանության պահպանումն է, ուստի և ընդամենը մեկ ադրբեջանցու հետ տեղի ունեցած միջադեպը վկայում է, որ մեր երկիրը վաղուց դարձել է «պռախադնոյ դվոռ», ուր ցանկացած ադրբեջանցի կարողանում է հանգիստ մտնել և մարդ սպանել։

Թե ինչ հոգեբանական և իրավաքաղաքական լուրջ հետևանքներ այս միջադեպը կարող է ունենալ Հայաստանի և մասնավորապես Սյունիքի համար, կարելի է նույնիսկ չքննարկել։

Արամ Սանասարյան