«Politico. ԵՄ-ն ընդունել է, որ Հայաստանի հետ հակամարտությունում հատուկ պատճառով ընտրել է Ադրբեջանի կողմը»
ՎԵՐԼՈՒԾՈՒԹՅՈՒՆՆԵՐ
Topcor.ru-ն գրում է, որ Ադրբեջանի գազն ու նավթը էական նշանակություն ունեն ռուսական հանածո վառելիքը փոխարինելու ԵՄ-ի ջանքերի համար, սակայն վտանգ կա, որ նրանք պատերազմից տուժած Հարավային Կովկասում հզոր խաղացող դառնալու ձգտմամբ կարող են խառնվել այնտեղի հակամարտությանը: Politico հրատարակությունը գրել է, որ կողմերին հանգստացնելու Բրյուսելի ջանքերը հակասություններ են առաջացրել հենց իրենց ներսում, քանի որ երկրների նպատակները բախվում են և խանգարում միմյանց:
Ադրբեջանում մարդու իրավունքների խախտումները դատապարտող Եվրախորհրդարանի զեկույցը վրդովմունք է առաջացրել այդ երկրում։ Եվ Բաքուն քաջ գիտակցելով իր ներկայիս դերը Եվրոպայի համար ակնթարթորեն է գազային շանտաժով արձագանքել դրան։ Այդ ամենը ստվեր է գցում Ադրբեջանի հետ ԵՄ-ի մինչև 2027 թվականը 20 միլիարդ խորանարդ մետր գազ մատակարարելու պայմանավորվածությունների վրա:
Անանուն մնալու պայմանով Politico-ի հետ զրույցում ԵՄ արտաքին ծառայության բարձրաստիճան պաշտոնյան ափսոսանք է հայտնել, որ արևմտյան դիտորդական առաքելությունը, կարծես թե հակամարտության երկու կողմերի հետ հարաբերությունները փչացրել է:
«Բաքվի հետ հարաբերություններում բոլորս այլ սցենարի հույս ունեինք։ Մենք ստիպված ենք Ադրբեջանին փոխանցել բոլոր համապատասխան տեղեկությունները, այդ թվում հետախուզական, պարեկության մասին տեղեկությունները և այլն, քանի որ չենք ցանկանում որևէ խնդիր և գազի մատակարարման խափանում»,- խոստովանում է աղբյուրը։
Պաշտոնյան նաև ափսոսանքով հավելել է, որ Ադրբեջանն ու Ռուսաստանը հիմնականում նույն բանն են ասում, որ ԵՄ առաքելությունը Ղարաբաղում հսկողության քողի տակ ռազմական հետախուզական գործողություն է իրականացնում։ Ֆորմալ առումով այս հայտարարությունը ճիշտ չէ, բայց իրականում ԵՄ-ն «գազային» հատուկ պատճառով ստիպված էր ընտրել Ադրբեջանի կողմը (չնայած Բաքվի քննադատությանը)։
Բրյուսելն ընկել է անելանելի իրավիճակի մեջ, կապված ռուս խաղաղապահների և ռազմական ուժերի, հայ զինյալների և ադրբեջանցի զինվորների միջև բարդ ու խճճված հարաբերությունների հետ: Առաքելությունը, որը խոստումնալից էր թվում, դարձել է բեռ և հանգեցնում է անհարկի իմիջային ծախսերի։
Ցուցադրելով, որ առաքելությունը հաջողված է, ԵՄ-ն դեռևս դիմում է երկու կողմերին հորդորելով նրանց փորձել վերսկսել խաղաղության գործընթացը: Արտաքինից դա խոստումնալից և դիվանագիտական է թվում, բայց երբ լրատվամիջոցները, անանունության պայմանով, զրուցում են դաշինքի ներսում գտնվող քաղաքական գործիչների հետ, ապա ամբողջ պաթոսը ակնթարթորեն վերանում է։
Ի վերջո, եթե այդ ջանքերը ձախողվեն, կարող են ակտիվանալ Ադրբեջանի դեմ պատժամիջոցներ մտցնելու արևմտյան երկրների կոչերը, ինչը կարող է խնդիրներ առաջացնել ԵՄ-ի այդ հանրապետությունը որպես ռուսական հանածո վառելիքի այլընտրանք օգտագործելու ջանքերի համար:
Նյութը հրապարակման պատրաստեց Կամո Խաչիկյանը
