Փաշինյանն ամեն ինչ արել է, որ ադրբեջանցի մարզիկները գան Հայաստան

Երևանում ապրիլի 15-ին մեկնարկելու է ծանրամարտի Եվրոպայի առաջնությունը, որին մասնակցելու են նաև ադրբեջանցի չորս մարզիկներ։ Թշնամի երկրի ներկայացուցիչներին Հայաստան հրավիրելու համար Նիկոլ Փաշինյանն անասելի համառություն և ջանքեր է գործադրել՝ ամեն գնով, անգամ սեփական արժանապտվությունը ոտնատակ տալով։

Մեր աղբյուրների փոխանցմամբ, ադրբեջանական կողմը կտրականապես չի ցանկացել մասնակցել երևանյան մրցաշարին, բայց քննադատություններից խուսափելու համար անվտանգության և կեցության այնպիսի պահանջներ է դրել, որ իրեն հարգող հյուրընկալող կողմը պարզապես կմերժեր։ Փաշինյանը մրցաշարի կազմկոմիտեի ղեկավար, իր աշխատակազմի ղեկավար Արայիկ Հարությունյանին, ԿԳՄՍ նախարար Ժաննա Անդրեասյանին և փոխնախարար Կարեն Գիլոյանին պարտադրել է գրեթե նախագահավայել կազմակերպել ադրբեջանցիների դիմավորումը, կեցությունն ու անվտանգությունը, միայն թե ստանա նրանց մասնակցության հաստատումը։

ԱԱԾ-ն օր ու գիշեր հսկելու է ադրբեջանցի մարզիկներին, իսկ նրանց լավագույն հյուրանոցներից մեկում են տեղավորելու, տեղափոխումն էլ իրականացնելու են վարչապաետի աշխատակազմի մեքենաներով։ Տեղ գյուղում ադրբեջանական սադրանքից հետո Բաքուն կրկին փորձել է խուսափել մրցաշարի մասնակցությունից, բայց այս անգամ էլ Նիկոլ Փաշինյանը ներգրավելու է եվրոպական կառույցներին, տարբեր խողովակներով, այդ թվում՝ Ժոզեպ Բորելի միջոցով Իլհամ Ալիևին պնդել, ո մասնակցեն։

Իբր ադրբեջանցիների մասնակցությունը դրական կազդի կարգավորման գործընթացի վրա։ Ի դեպ, ադրբեջանցի մարզիկները բնավ էլ թույլ չեն, պատկերացնել կարելի է, թե Մարզահամերգային համալիրում, ցեղասպանության զոհերի հուշահամալիրից ոչ հեռու, եթե, Աստված մի արասցե, Ադրբեջանի դրոշ բարձրացվի, ինչ դժգոհության ալիք է բարձրանալու։

Լիլիթ Ավագյան