Մանե Թանդիլյանը պնդում է՝ Հայաստանի անվտանգության համակարգի խոցելիությունը լուրջ խնդիրներ է առաջացնում

Հայաստանի անվտանգության համակարգի խոցելիությունը լուրջ խնդիրներ է առաջացնում ոչ միայն սահմանին, այլ նաև արդեն նույնիսկ սահմանամերձ չհամարվող բնակավայրերի համար։ «Ապրելու երկիր» կուսակցության նախագահ Մանե Թանդիլյանն այս արձանագրումն արել է երկ, դեռևս մինչև Տեղ գյուղում տեղի ունեցած ցավալի միջադեպը, երբ հայկական կողմը 4 զոհ և 6 վիրավոր է ունեցել՝ ադրբեջանական սադրանքի հետևանքով։

Մանե Թանդիլյանն անդրադարձել էր ադրբեջանցի 2 զինվորականների կողմից Հայաստանի սահմանն անցնելու դեպքին, նշել, որ դա լուրջ մտահոգությունների տեղիք է տալիս։ «Նույնիսկ, եթե հավատանք մոլորվելու պաշտոնական վարկածին, պարզապես անթույլատրելի է այն փաստը, որ ադրբեջանցին հայտնաբերվել է սահմանից 20 կմ ներթափանցելուց հետո, այն էլ ոչ անվտանգության մարմինների կողմից», - նշում է Թանդիլյանն ու հավելում. «Միևնույն ժամանակ հարկ է արձանագրել, որ ադրբեջանական արևմտյան սահմանը 30 տարի է փոփոխությունների չի ենթարկվել և անվտանգության մասով խնդիրները պետք է ունենան գրեթե զրոյական ռիսկ»։

Անդրադառնալով գործող վարչախմբին՝ «Ապրելու երկիր» կուսակցության նախագահը նշում է, թե իշխանությունների առաջնահերթությունները շարունակում են հեռու մնալ անվտանգության համակարգի մարտահրավերներից՝ այդպես էլ չամրագրելով խաղաղության հասնելու միակ բանաձևը՝ ուժեղ և կայուն անվտանգության համակարգը։

«Հայաստանն ունի մեկ առաջնային խնդիր՝ անվտանգության և բոլոր քայլերի վերջնակետը պետք է ուղղղված լինի անվտանգության նոր համակարգի ստեղծմանը», - ընդգծել է Մանե Թանդիլյանը։

Նրա այս արձանագրումը հերթական անգամ փաստում է Հայաստանի լրջագույն խնդիրները։

Օրեր առաջ էլ Ռուբեն Վարդանյանն էր իր տելեգրամյան ալիքում նշել, որ ցանկացած խաղաղության պայմանագիր ոչինչ է և կխախտվի յուրաքանչյուր պահի, եթե Հայաստանն ու Արցախը չունենան ամուր բանակ և կռվելու կամք, միայն այդ կերպ հնարավոր կլինի թշնամուն հարկադրել խաղաղության, իսկ քանի դեռ գործող իշխանությունները զբաղված են թուրք-ադրբեջանական տանդեմի քմահաճույքները կատարելով, նման միջադեպեր լինելու են պարբերաբար և կրկնվող։ 

Սուրեն Կարապետյան