Արամ Սարգսյանը թռչում է Փաշինյանի խորտակվող նավից

Արամ Սարգսյանի «Հանրապետություն» կուսակցությունը հրաժարվել է համագործակցել «Քաղաքացիական պայմանագրի» հետ Երևանի ավագանու առաջիկա ընտրություններում, փոխարենը այլ եղանակով է պատրաստվում մասնակցել այդ ընտրություններին։

Ընտրություններին հնարավոր վատ արդյունքը չեզոքացնելու, այլ քաղաքական ուժերի ներգրավմամբ որևէ դրական արդյունք ցույց տալու համար Փաշինյանը դաշինք կազմելու առաջարկներ է արել մի քանի ուժերի, այդ թվում՝ Արամ Սարգսյանին, սակայն վերջինս կտրուկ մերժել է: Սարգսյանը նեղ շրջապատում կարծիք է հայտնել, թե «Քաղպայմանագիրը» բոլոր ոլորտներում ձախողվել է, վարկանիշը շատ ցածր է, իշխանություն պահելու շանսերը գնալով պակասում են:

ԱԺ արտահերթ ընտրություններում ցուցաբերած համեմատաբր լավ արդյունքը՝ մոտ 3,5 տոկոս, նախկին վարչապետ սրտում հույսեր են վառել, թե իր ղեկավարած ուժի վարկանիշն ավելի բարձր է, անգամ կարող է որպես ընդդիմություն խաղալ։ Իրականում, Սարգսյանը հրաշալի հասկանում է, որ Նիկոլ Փաշինյանի նավը խորտակվում է։

Նույնիսկ ամենածայրահեղ պահերին «Հանրապետություն» կուսակցության առաջնորդը եղել է Փաշինյանի միակ դաշնակիցը, սակայն այսօր ինքն էլ հասկանում է, որ Նիկոլ Փաշինյանի իշխանությունը վերարտադրվելու, գոյատևելու որևէ շանս չունի, ուստի և պարզապես թռչում է խորտակվող նավից։ Թեպետ, նույնիսկ այդ փախուստը որևէ կերպ չի օգնելու Արամ Սարգսյանին։ Նա այնքան է խորացել այս իշխանությանն ամեն անհեթեթ հարցով պաշտպանելու իր մղումներում, որ այլևս քաղաքական գործիչներն ու կուսակցությունները Սարգսյանին լուրջ չեն կարող ընդունել։

Ռուսական դաշտում նախկին վարչապետը վաղուց որևէ աջակից չունի, անգամ ՌԴ-ում Հայաստանի դեսպան, պաշտպանության նախկին նախարար Վաղարշակ Հարությունյանն է ձեռ քաշել նրանից, իսկ Արևմուտքն էլ վաղուց որևէ խաղադրույք չի անում «Հանրապետություն» կուսակցության վրա։

Լուսինե Ավետիսյան