Հայաստանը Պենտագոնի ուշադրության կենտրոնում

Պենտագոնը «Պաշտպան 2023» երկամսյա բազմազգ զորավարժությունների մասնակիցների շարքից հեռացրել է Հայաստանի անունը։ Այդ մասին երեկ մենք հայտնել ենք և նշել, որ գործող իշխանություններն այդպես էլ չեն մեկանաբանել. թե ինչպես էր հնարավոր եղել , որ ՀԱՊԿ անդամ երկրների զինված ուժերի մասին տեղեկությունը հայտնվի Պենտագոնի կայքում՝ զորավարժությունների մասնակիցների թվում։

Կարծիք էինք հայտնել, որ արտաքին ճնշումների հետևանքով էր Հայաստանի անունը նախ հայտնվել, ապա մեկ այլ արտաքին ճնշման հետևանքով էլ հեռացվել էր։ Հայաստանի պաշտպանության նախարարությունից երեկ որևէ մեկնաբանություն չեն տվել կատարվածի վերաբերյալ, ավելին պաշտպանության նախարարի մամուլի քարտուղար Արամ Թորոսյանը հայտնել է, թե ՊՆ-ն ընթացիկ տարում պլանավորում է մասնակցել Եվրոպայում ԱՄՆ-ի ցամաքային զորքերի հրամանատարության կողմից կազմակերպվող երկու այլ՝ «Կոսովոյի ուժեր» և «Միաձուլված սուր» զորավարժություններին։

Այս ֆոնին չափազանց ուշագրավ է օրերս տեղի ունեցած մի այց։ Ապրիլի 5-ից 7-ը աշխատանքային այցով Հայաստանում է գտնվել բրիգադային գեներալ Պատրիկ Էլիսը։ Հայաստանում Միացյալ նահանգների դեսպանատան փոխանցմամբ, նա հանդիպել է պաշտպանության նախարարության պաշտոնատար անձանց հետ ՝ քննարկելու հայ –ամերիկյան պաշտպանական համագործակցության ամրապնդմանն ուղղված ջանքերը, այցելել խաղաղապահ բրիգադի «Զառ» ուսումնական կենտրոն և Ռազմական ակադեմիա։

Հայաստանի զինված ուժերի նկատմամբ ՆԱՏՕ-ի զինուժի նման ուշադրությունը չափազանց մտահոգիչ և տարատեսակ եզրակացությունների առիթ է տալիս։ Արտաքին քաղաքական վեկտորը փոխելու խոսակցություններին զուգահեռ, ՆԱՏՕ-ի զինված ուժերի հետ հարաբերությունների սերտացման ճանապարհը ակնհայտորեն վկայում է գործող իշխանությունների հակառուսական տրամադրվածության մասին, առավել ևս Ուկրաինայում ռուսական ռազմական գործողության ֆոնին տեղի ունեցող իրադարձությունները չափազանց ուշագրավ են և , ըստ էության, փաշինյանական վարչախմբին չի հաջողվում խուսանավել Արևմուտքի և Ռուսաստանի միջև, ի վերջո, երկու կողմն էլ վերջնականապես պարզ հարց են դնելու , թե որտեղ է կողմնորոշվելու Հայաստանը։ Հաշվի առնելով Փաշինյանի և նրա կողմնակիցների տրամադրվածությունները, չի բացառվում, որ Հայաստանը ընտրի Արևմուտքը։

Արտյոմ Ստեփանյան