«Քաղպայմանագրում» ներքին գզվռտոցները հասել են գագաթնակետին

Ազգային ժողովի նախագահ Ալեն Սիմոնյանի մասնակցությամբ միջադեպը առիթ և հնարավորություն էր «Քաղաքացիական պայմանագիր» կուսակցության համար գզրոցներից հանելու հին հաշիվները, փորձելու թուլացնել ԱԺ նախագահի ազդեցությունը թիմում, նաև, հնարավորության դեպքում, ազատվել նրա ներկայությունից։

Առաջին ծիծեռնակը, թերևս անսպասելի, Նիկոլ Փաշինյանի որդու «հերքումն» էր հենց ընտանեկան թերթում։ Թեև իր նկատմամբ բռնությունները հերքելու տեղեկության մեջ Ալեն Սիմոնյանի անունը չէր նշվում, սակայն հայաստանյան իրողություններին նվազագույն չափով տեղյակ յուրաքանչյուրն էլ հասկանում էր՝ թիրախը Ալեն Սիմոնյանն է։ 

Վերջինս օրեր առաջ բավական էմոցիոնալ էր արտահայտվել Կասկադում տեղի ունեցած միջադեպին, ֆեյսբուքյան մի գրառում արել, դիմել ընդդիմադիրներին. «...ես իմ ժողովրդի հետ հեղափոխություն արած, պատերազմ տեսած, հաղթանակ ու պարտություն ճաշակած երևանցի տղա եմ, ումից դուք միշտ փախչելու եք»։ Չհերքելով ոչ կատարվածը, ոչ դաշնակցական երիտասարդի դեմքին թքելու հանգամանքը՝ Ալեն Սիմոնյանին թվացել էր, թե կարող է առնվազն կուսակցության մակարդակում մարսել։

Իսկ բոլորը գիտեն, որ ցանկացած ՔՊ-ականի համար կարևորը կուսակցության կամ, ավելի ճիշտ, կուսակցապետի կարծիքն է և ցանկությունը։ 

Երեկ արդեն, ըստ երևույթին, վախենալով իր դեմ նյութվող դավերից, Ալեն Սիմոնյանը ներողության մի տեքստ է գրել, ներողություն խնդրել Հայաստանի բոլոր քաղաքացիներից։ «Այո, ժողովրդավարությունը ենթադրում է, որ պաշտոնյան պետք է և կարող է քննադատվել, ինչու ոչ` կարող են նաև սադրանքներ տեղի ունենալ։ Մեր խնդիրն է դրանց չտրվելը։ Ես ցավում եմ, որ ինձ ուղղված անձնական վիրավորանքից հունից դուրս եկա: Վստահ եմ, որ արժանապատվություն ունեցող որևէ հայ մարդ չէր հանդուրժի նման վիրավորանքը, սակայն ընտրված պաշտոնյայի վրա դրված բարձր պատասխանատվությունը պիտի զսպող դեր ունենա: Սա նաև դաս է ինձ համար, որովհետև, ամենայն հավանականությամբ, ես եւ մեր թիմի այլ ներկայացուցիչներ ապագայում էլ կբախվենք նման իրավիճակների հետ»,- գրել է Ազգային ժողովի նախագահը:

Թվում է, թե այսքանը բավարար է գոնե «Քաղաքացիական պայմանագրի» ներսում խնդիրները և դավերը հարթելու, հետագա պաշտոնավարումը շարունակելու համար։ Կուսակցության հիմնադիր անդամ Ալեն Սիմոնյանը, սակայն, սայթաքել է՝ նաև ներողություն խնդրելով։ Իսկ ոհմակում սայթաքումը չեն ներում։ Այս նվաստացումից հետո խորհրդանաի նախագահին հեռացնելը զուտ տեխնիկայի հարց է։ Խնդիրը միայն ոհմակապետի անձնական ցանկությունն է։ 

Լաուրա Ավետիսյան