Հրաչյա Սարգսյանը հասարակության մեջ հիշվեց իր չհիշված քաղաքապետ լինելով

Երևանի նախկին քաղաքապետ Հրաչյա Սարգսյանը նշանակվել է Նիկոլ Փաշինյանի խորհրդական: Այս մասին նա հայտնում է իր ֆեյսբուքյան էջում և շնորհակալություն հայտնում վստահության համար: Այս կերպ Հրաչյա Սարգսյանին վարձահատույց են լինում, որ  քաղաքապետի պաշտոնը զբաղեցնելով հանդերձ տեղակալ կամ գուցե հենց խորհրդական էր աշխատում  փոխքաղաքապետ Տիգրան Ավինյանի մոտ:

Հրաչյա Սարգսյանը հասարակության մեջ հիշվեց իր չհիշված քաղաքապետ լինելով: Նախ նա գործիք դարձավ իշխանության ձեռքին Հայկ Մարությանից ազատվելու համար և օժանդակեց Մարությանին անվստահություն հայտնելու գործընթացին: Հետո էլ նրան պարզ տեքստով ասացին, որ մի քանի ամիս դեռ կարող է քաղաքապետի պաշտոնը զբաղեցնել, բայց միևնույն է իշխանության թեկանծուն Տիգրան Ավինյանն է:

Ինչ խոսք, իր դերը լավ կատարեց և հենց Ավինյանի պահանջով էլ հրաժարականի դիմում գրեց, քանի որ իշխանությունը որոշել էր Երևանի քաղաքապետի ընտրություններն անցկացնել ամռանը: Տարվա այդ եղանակին հասարակությունը սովորաբար զբաղված է լինում  հանգիստը կազմակերպելով, շատերը նույնիսկ երկրում չեն լինում, իսկ քաղաքական գործընթացներ կարծես չկան: Աշնանը քաղաքական կյանքն ակտիվանում է, ընդդիմությունն էլ սկսելու է հիշեցնել նախկին խոստումները, ելույթների հարթակն ավելի մեծ է լինում թեկուզ միայն այն պատճառով, որ ԱԺ-ն արձակուրդից վերադառանում է: 

Ընդ որում, Ավինյանի համար աշխատած քաղաքապետի համար այլ հարմար, մասնագիտական աշխատանք գտնել չի հաջողվել և որոշել են վարձահատույց լինելու համար դարձնել խորհրդական: Այն անձինք, ովքեր հավատարիմ են վարչապետին և թիմին, անկախ ամեն ինչից, դրա համար պատրաստ են նույնիսկ սեփական արժանապատվությունը դնել զոհասեղանին, ապա անվարձահատույց չեն մնում Նիկոլ Փաշինյանի կողմից: Նրանք սովորաբար զբաղեցնում են վարչապետի կա՛մ օգնականի, կա՛մ խորհրդականի պաշտոնը: Օրինակ՝ նախկին փոխվարչապետ Համբարձում Մաթևոսյանը դարձավ խորհրդական, Շիրակի նախկին մարզպետ Նազելի Բաղդասարյանն էլ օգնական:

Աննա Ավետիսյան