Արամ Սարգսյանը գտավ «Ելքը», Փաշինյանի հետ կոալիցիա չի ուզում

Մինչ քաղաքական տարբեր ուժեր քննարկում են Երևանի ավագանու ընտրություններում առաջադրվելու հնարավորությունը, փորձում թիմեր ձևակերպել, մեր աղբյուրների փոխանցմամբ, գործող «Քաղաքացիական պայմանագիր» կուսակցությունը մտադիր է ավագանու ընտրություններին մասնակցել ոչ թե «Իմ քայլը» դաշինքով կամ «Քաղաքացիական պայմանագիր» կուսակցության անունով, այլ բոլորովին նոր դաշինք ստեղծել դաշնակիցների հետ։

Մեր աղբյուրի փոխանցմամբ, ի դեպ, առաջարկվել է այդ դաշինքը անվանել «Ելք» և այնտեղ ընդգրկել Արամ Սարգսյանի գլխավորած «Հանրապետություն» կուսակցությունը և Էդմոն Մարուքյանի՝ «Լուսավոր Հայաստանը»։

«Ելք» դաշինքը, դեռևս մինչև հեղափոխությունը բավականին տպավորիչ արդյունքներ էր գրանցել Երևանի ավագանու ընտրություներում և Ազգային ժողովում, դարձել նաև, այսպես կոչված, հեղափոխության լոկոմոտիվը։ Թերևս, սակայն, այս մտահաղացմանը իրականանալ այդպես էլ չի հաջողվի։

«Հանրապետություն» կուսակցությունը մտադիր է միայնակ գնալ։ «Քաղաքացիական պայմանագրի» ներկայացուցիչները չափազանց տարակուսած են, Արամ Սարգսյանի այս որոշումից, չեն կարողանում պատկերացնել, թե ինչպես կարող է «Հանրապետությունը» ինքնուրույն հավաքել բավարար թվով ձայներ՝ խորհրդարան անցնելու համար։ Չի բացառվում, որ Սարգսյանը, որպես քաղաքապետի թեկնածու ներկայացնի որևէ այլ անհատի, ինչու ոչ, նախկին իշխանությունների հետ կապ ունեցած որևէ անձի, այս պարագայում «Քաղաքացիական պայմանագիրը» սկսելու է հարվածել նախկին դաշնակցին։

Սարգսյանն, առանց այն էլ իր վերջին շրջանի մի քանի հայտարարությունների պատճառով, հայտնվել է «Քաղպայմանագրի» ուղղակի թիրախի տակ և իշխանական մեդիան ու ռեսուրսները հազիվ են իրենց զսպում նրան չհարվածելու։

Հիշեցնենք՝ «Պահպանողական» կուսակցության նախկին նախագահ Միքայել Հայրապետյանի՝ օլիգարխ Ռուբեն Հայրապետյանի հասցեին ֆեյսբուքյան դիֆերամբներից հետո Արամ Սարգսյանը նույնպես միացել էր այդ «խրախճանքին», հայտարարել, թե Ռուբեն Հայրապետյանն իր ընկերն է և ինքն էլ նրա վերադարձի դեպքում գնալու է օդանավակայան՝ դիմավորելու։

Ռուբեն Հայրապետյանը Հայաստան կարող է վերադառնալ միայն Նիկոլ Փաշինյանի իշխանազրկման դեպքում։ «Քաղպայմանագրում» կարծում են, թե Արամ Սարգսյանը, որը չի խորշել քրեական ուշագրավ ացնյալ ունեցող Ռուբեն Հայրապետյանին հրապարակավ իր ընկեր հայտարարել, ամեն ինչ անում է՝ Փաշինյանի իշխանազրկումը արագացնելու ուղղությամբ։ Ուստի և , իր անզգույշ հայտարարության հետևանքով, Արամ Սարգսյանը առաջիկայում կարող է դառնալ հենց «Քաղպայմանագրի» հարվածի հիմնական ուղղություններից մեկը։ 

Ռոբերտ Նալբանդյան