Գուցե 5-րդ շարասյունը տեղեկատվությունն այդ նույն «դիվանագիտական խողովակների» միջոցով է փոխանցել

Երևանն ու Բաքուն արդեն մի քանի անգամ միմյանց առաջարկներ են ուղարկել ապագա խաղաղության պայմանագրի վերաբերյալ։

Հայաստանի ԱԳՆ-ն չի բացահայտում Ադրբեջանի հետ խաղաղության պայմանագրի շուրջ շփման մեխանիզմը։ Sputnik Արմենիան գրավոր հարցում էր ուղարկել Հայաստանի ԱԳՆ՝ խնդրելով տեղեկացնել, թե ինչպես են կողմերը միմյանց փոխանցում իրենց առաջարկները։

«Հայաստանի և Ադրբեջանի միջև խաղաղության պայմանագրի շուրջ առաջարկները փոխանակվում են դիվանագիտական խողովակներով»,- պատասխանել են ԱԳՆ-ից։

Ոչ վաղ անցյալում էլ վարչապետ Փաշինյանը հայտարարում էր, որ իր և Ալիևի միջև գործում է օպերատիվ կապ:

Գուցե այդ կապի արդյունքում էլ կողմերն ականապատ տարածքների և գերիների փոխանակման պայմանավորվածություն էին ձեռք բերում: Այդ կապո՞վ որոշվեց և հանձնվեց Արցախի շրջանի Աղավնո, Սուս, Բերձոր բնակավայրերը, այդ կա՞պը դարձավ պատճառ, որ Կավսականում նահանջի հրաման տրվեց, դրա՞ արդյունքում Սյունիքի բնակավայրերին վարչապետն ադրբեջանական անուններ տվեց և այլն:

Հավանաբար այդ կապը գործել է նաև 44-օրյա պատերազմից առաջ, նախկին ԱԱԾ պետերից Արթուր Վանեցյանն ասում էր, որ ինքն այդ եղանակով ծրար է ստացել և փոխանցել Նիկոլ Փաշինյանին: Այդ կապը  կարող է լինել նաև նրա արդյունքը, որ Ալիևը հայտարարում է թե Փաշինյանը խոստումներ ունի տված և չի կատարում: 

Այն  իշխանությունն է հայտարարում, որ փոխանցում  իրականացվում է  «դիվանագիտական խողովակների» միջոցով, որը հայտարարում էր, թե ժողովրդի թիկունքում որևէ որոշում չի կայացնի:

 Դիվանագիտական խողովակների, օպերատիվ կապի մասին խոսող իշխանությունը նաև հայտարարում է, թե բանակում պատերազմի ժամանակ 5-րդ շարասյուն է գործել՝ նկատի ունենալով դավաճաններին: 

Նկատենք, որ Փաշինյանի հետ աշխատած շատ բարձրաստիճան սպաներ հայտարարեցին, որ եթե այդպիսին եղել է, ապա այդ շարասյան ղեկավարը հենց ինքն է եղել:

Օրերս էլ այդ հարցին  անդրադարձավ երրորդ նախագահ Սերժ Սարգսյանը և նմանատիպ կարծիք հայտնեց՝ նշելով, որ իր կառավարման տարիներին 5-րդ շարասյուն չի գործել: Ասում են, մարդիկ դիմնացինին մեղադրում են այն բանում, ինչին իրենք են ընդունակ: Գուցե 5-րդ շարասյունը տեղեկատվությունն այդ  նույն «դիվանագիտական խողովակների» միջոցով է փոխանցել:

Աննա Ավետիսյան