Ընդդիմությունը Երևանի ավագանու ընտրություններին կարող է մասնակցել մի քանի խմբերով
ՎԵՐԼՈՒԾՈՒԹՅՈՒՆՆԵՐ
Ընդդիմությունը Երևանի ավագանու ընտրություններին կարող է մասնակցել մի քանի խմբերով, ինչը բավականին լուրջ և բացասական հետևանքներ կունենա։
Թերևս, առայժմ միայն իշխանության թեկնածու Տիգրան Ավինյանն է, որ հստակորեն ազդարարել է իր առաջադրման մասին, ազատվել նաև Հրաչյա Սարգսյանի ներկայությունից, իսկ երեկ էլ արդեն քաղաքապետարանի աշխատակազմի գործակարգավարական խորհրդակցությունը վարում էր հենց Ավինյանը։
Թեև Երևանի քաղաքապետի պարտականությունները կատարում է Լևոն Հովաննիսյանը, սակայն Ավինյանը հայտարարել է, թե իրենք տեղակալներով աշխատանքի բաժանում են իրականացրել և խորհրդակցությունները վարելու է անձամբ։
Ընդդիմության թեկնածուների հստակ թիվը հայտնի չէ։ Տիտղոսային խորհրդարանական ընդդիմությունը կարող է մի քանի թևով բաժանվել։ Մամուլն արդեն գրել է, որ «Հայաստան» դաշինքի պատգամավորը՝ Արդրանիկ Թևանյանը, մտադիր է թեկնածու դառնալ, սակայն այս առաջադրման մեջ մի էական խնդիր կա։ Թևանյանը թեև «Հայաստան» դաշինքի պատգամավոր է, հարցն այն է, թե որ քաղաքական ֆորմատով է նա առաջադրվելու և ինչ թիմով։
«Հայաստան» դաշինքն, իրականում, այլևս գոյություն չունի և ընդամենը ֆորմալ պահպանում է իր անվանումը։ Դաշինքի պատգամավորների մեծամասնութունը ՀՅԴ անդամներ են և կան նաև Ռոբերտ Քոչարյանին նվիրված մի խումբ անհատներ, որոնցից մեկն էլ հենց Անդրանիկ Թևանյանն է։ Տեղեկություններ են շրջանառվում, որ ՀՅԴ-ն ևս մտադիր է թեկնածու առաջադրել և մեծ հավանականությամբ կառաջադրվի հենց կուսակցության անունից։
«Հայաստան» դաշինքը, հիշեցնենք, կազմավորվել էր ՀՅԴ և «Վերածնվող Հայաստան» կուսակցություններից։ «Վերածնվող Հայաստանն» այլևս լքել է «Հայաստան» դաշինքը և չի մասնակցում, ուստի չափազանց ուշագրավ կլինի տեսնել, թե որ քաղաքական ուժի միջոցով և ցուցակով է Անդրանիկ Թևանյանը առաջադրվելու։
Այդ դեպքում կստացվի, որ ընդդիմադիր հիմնական դաշինքը ընտրություններին մասնակցում է 2 թեկնածուով։
Շրջանառվող տեղեկությունների համաձայն՝ առաջադրվելու է նաև Արթուր Վանեցյանը, որը թեև դուրս է եկել «Պատիվ ունեմ» դաշինքից, սակայն նա ևս ասոցացվում է այդ դաշինքի հետ։ ՀՀԿ-ն էլ թեկնածու առաջադրելու դեպքում էլ կստացվի, որ միայն խորհրդարանական ընդդիմությունում 4 թեկնածուով ու ցուցակներով է մասնակցելու ընտրությանը։
Իհարկե, սա չափազանց բացասական զարգացում է, քանի որ այդ պարագայում ընդդիմությունը կփոշիացնի իր իսկ ձայները՝ հնարավորություն տալով Նիկոլ Փաշինյանին առանձին-առանձին հաղթել բոլոր ընդդիմադիր ուժերին։
Նարե Մինասյան
