Մի շարք մարզաձևերում մարզիչների ատեստավորում կանցկացվի

Անցյալ շաբաթ ԿԳՄՍ նախարարի տեղակալ Կարեն Գիլոյանը հայտարարել էր, որ առաջիկայում մի շարք մարզաձևերում մարզիչների ատեստավորում կանցկացվի։ Ատեստավորումը լինելու է կամավոր։ Արդեն հրապարակվել է, թե՛  թեստի լրացման ուղեցույցը, թե՛   կառուցվածքը, թե՛  այն գրականության ցանկը, որն անհրաժեշտ է ատեստավորմանը մասնակցելու համար։

Ատեստավորման գործընթացը նախատեսվում է իրականացնել ապրիլի 29-30-ը:  Ատեստավորումն անցկացվում է գրավոր։ Թեստերը բաղկացած են ընտրովի կամ կարճ պատասխաններ պահանջող առաջադրանքներից: Մարզչական կազմն անպատասխան հարցեր ունի։ Մարզիչներն ունեն սաներ, ովքեր մասնակցում են տարբեր միջոցառումների և բերում են բազում հաղթանակներ։ Սրանից ելնելով արդեն իսկ երևում է, թե ո՞վ է արդյունավետ աշխատում, և ո՞վ՝ ոչ։  

ԿԳՄՍ փոխնախարար Կարեն Գիլոյանն այդ կարծիքին չէ։ «Այն արդյունքի համար, որը ցույց են տալիս մարզիչների սաները, նրանք մի քանի հարթակներով պարգևատրվում են։ Ատեստավորումը մարզիչների տեսական գիտելիքների ստուգումն է և նոր հնարավորություն է ավել գումար ստանալու՝ ապացուցելուց հետո, որ իրենք իրազեկ են և տեսականորեն լավ պատրաստված։ Չէ՞ որ բոլոր մարզիչները չեն, որ կարող են աշխարհի չեմպիոն տալ։ Մենք ամեն տարի չենք կարող 40 աշխարհի չեմպիոն ունենալ։ Շատ մարզիչներ կան, որ տեսականորեն պատրաստված են, գրագետ են, սակայն այնպես է ստացվում, որ որոշ սաներ իրենց մոտ չեն կարողանում լուրջ արդյունքներ տալ և չեն դառնում չեմպիոն։ Հիմա իրենք ստանան նույն ցածր աշխատավա՞րձը։ Իրենք հիմա մոտավորապես ստանում են 100-150 000 դրամ աշխատավարձ և ասում են, որ դա քիչ է, ինչի հետ ես համաձայն եմ։ Այս նախագիծը հենց նման մարզիչների համար է, որ իրենք էլ ստանան բարձր աշխատավարձ։ Ատեստավորման արդյունքում հնարավորություն կունենան իրենց աշխատավարձերը բարձրացնել 100 000, 80 000, 50 000 դրամներով»,- Լրատվականի հետ զրույցում ասաց ԿԳՄՍ փոխնախարար Կարեն Գիլոյանը։

Ի դեպ, նշենք, որ 2024 թվականից սկսած՝ կամավոր ատեստավորմանը մասնակցելու հնարավորություն կունենան նաև պետական և համայնքային մանկապատանեկան ստեղծագործական և գեղագիտական կենտրոններում, մշակույթի տներում դասավանդող մանկավարժական աշխատողները։ 

Աննա Ավետիսյան