Եթե Փաշինյանի կառավարմամբ է տեղի ունեցել 5-րդ շարասյան ձևավորումը, հավանաբար ինքն էլ ղեկավարել է. ՀՀ երրորդ նախագահի դիտարկումներն՝ ամփոփ

« Իմ նախագահության օրոք 5-րդ շարասյուն չենք ունեցել։ Եթե այդ մարդը գիտի, որ 5-րդ շարասյուն ենք ունեցել, բա ինչո՞ւ միջոցներ չի ձեռնարկել այդ 5-րդ շարասյան դեմ։ Իմ կարծիքով՝ նա ինչ-որ տեղ ճիշտ է ասում, միգուցե ի՞նքն է գլխավորում այդ 5-րդ շարասյունը։ Եթե այդքան մանրամասն տեղյակ է, բնական է»,- ասաց երրորդ նախագահը։

Այս մասին երեկ՝ մարտի 24-ին, Սամվել Ֆարմանյանի գրքի շնորհանդեսից հետո լրագրողների հետ ճեպազրույցում ասաց ՀՀ երրորդ նախագահ Սերժ Սարգսյանը՝ անդրադառնալով Նիկոլ Փաշինյանի այն հայտարարությանը, թե Հայաստանը պարտվել է, որովհետև բանակում գործել է 5-րդ շարասյուն։ 5-րդ շարասյուն ասելով Նիկոլ Փաշինյանը նկատի ունի դավաճաններին: Երրորդ նախագահի դիտարկմամբ էլ, եթե Փաշինյանի կառավարմամբ է տեղի ունեցել այդ շարասյան ձևավորումը, հավանաբար ինքն էլ ղեկավարել է:  

Ընդ որում, պաշտպանության նախարար Սուրեն Պապիկյանի այն հատարարությունը թե հնարավոր է, որ այդ 5-րդ շարասյունը կառավարվել է արտաքին ուժերի կողմից, Սարգսյանը անլուրջ համարեց. «Երևի Սուրեն Պապիկյանը հավաստի տեղեկություններ ունի, հակառակ դեպքում այդպիսի անլուրջ հայտարարություններ չի կարող անել։ Ես դրսից կառավարվող այլ մարդկանց գիտեմ, որոնք իրենց երբեք 5-րդ շարասյուն չեն համարում. դրսից կառավարվող ուրիշ մարդկանց չգիտեմ»,- նշեց ՀՀ երրորդ նախագահը:

Այս թեման ՀՀ վարչապետը շրջանառում է մի այնպիսի փուլում, երբ գրեթե բոլոր նեղ մասնագետները, այդ թվում հենց ինքը և ԱԳ նախարարությունը խոսում են մոտալուտ նոր էսկալացիայի վտանգի մասին: Երրորդ նախագահն այստեղ երկու տարբերակ ուներ՝ կամ պետք է պատասխաներ, կամ էլ լռեր  այն օրակարգ չբերելու համար: Գուցե ինքն իսկապես լռեր օրակարգից հարցը դուրս թողնելու և բանակը ևս մեկ անգամ կռվածաղիկ չդարձնելու համար՝ թե ո՞վ և ի՞նչ է արել, այդ բանակի համար, բայց դա իշխանության քարոզչամեքենայի կողմից դիտվելու էր լռությունը համաձայնության նշան է թեզի շրջանակներում: Վաղ առավոտից էլ ՔՊ-ական մի խումբ պաշտոն ստացած անձինք սկսելու են պատասխանել կամ հակադարձել Սարգսյանին և ինչպես իշխանությունն էր ցանկանում, թեման մնալու է շրջանառվողներից:

Ընդ որում, հավանաբար, երբ Նիկոլ Փաշինյանին որոշ ժամանակ անց հարց ուղղվի, թե քանի հոգու անուն կարող է տալ, որ այդ շարասյան անդամ են եղել, լռելու է և պատասխանի այն, ինչ ինքն է ցանկանում, բայց անուններ չի թվարկելու: Սա բանակը  բարոյալքելուն է ուղղված:

Սպան, զինվորը, երբ իմանա, որ երկրի ղեկավարությունը յուրաքանչյուրի մեջ դավաճան է տեսնում, ապա ինքն էլ է ծառայակցի մեջ դավաճան փնտրելու, իսկ չվստահելով թիկունք թիկունքի չեն կարող կռվել:

Աննա Ավետիսյան