Ավինյանն ուզում է ազատվել Փաշինյանի բեռից

Երևանի քաղաքապետի առաջիկա ընտրություններում գործող իշխանությունները կարող են մասնակցել ոչ «Քաղաքացիական պայմանագրի» անունով։ Իշխանության թեկնածուն՝ Տիգրան Ավինյանը, ամեն ինչ անում է, որպեսզի դաշինք լինի քաղաքական դաշնակից որևէ կուսակցություններից մեկի հետ, այդ կերպ ընտրողին փորձելով համոզել, թե «Քաղաքացիական պայմանագիրը» կամ«Իմ քայլը» դաշինքը չեն մասնակցում ընտրություններին։

Մեր աղբյուրների փոխանցմամբ՝ Տիգրան Ավինյանը միշտ էլ այն անձանցից է եղել, որոնք ազատ են եղել Նիկոլ Փաշինյանի հետ շփումներում, որտեղ ինչ ուզեցել արտահայտվել են, անգամ Նիկոլ Փաշինյանն է «քարտ բլանշ» տվել Տիգրան Ավինյանին։

Սա տարակուսելի է եղել մշտապես սեփական կողմնակիցների համար, որոնցից շատերը պատժվել են Փաշինյանի հետ տնավարի վարվելու դեպքում։ Նույնիսկ 2018 թվականի իշխանափոխությունից հետո, երբ Նիկոլ Փաշինյանը գրեթե 100%-անոց ռեյտինգ ուներ հանրության շրջանում, Տիգրան Ավինյանը միակն էր, ով կարող էր իրեն թույլ տար ծաղրել Նիկոլ Փաշինյանին, կամ քամահրանքով վերաբերվել նրա հանձնարարաությունների նկատմամբ։

Իսկ հիմա Երևանի քաղքապետի ընտրություններից առաջ Ավինյանը չի էլ թաքցնում իր դժգոհությունը «Քաղաքացիական պայմանագրից», իր մերձավոր շրջապատում, որը բավականին լուրջ ընդլայնվել է նրա կապերի շնորհիվ, Ավինյանը հայտարարել է, թե իր ամենամեծ մտավախությունը ոչ թե վարչական լծակների օգտագործման հնարավորությունների սակավությունն է, կամ կրիմինալի հետ գործարքի գնալը, այլ Նիկոլ Փաշինյանի և «Քաղաքացիական պայմանագրի» հետ իրեն կապելը, իսկ այդ հանգամանքը կարող է լուրջ հարված հասցնել Տիգրան Ավինյանի ընտրվելու հեռանկարին։

Եվ այժմ Ավինյանն ու իր թիմը մտածում են ինչպես չեզոքացնել Նիկոլ Փաշինյանի և «Քաղաքացիական պայմանագրի» վատ ռեյտինգը Երևանում, առավել ևս, որ Երևանը ամենաընդդիմադիրն է բոլոր բնակավայրերից և «Քաղաքացիական պայմանագիրը», ինչպես ցույց են տալիս վերջին հարցումները, բավականին ցածր վարկանիշ ունի։

Մեր աղբյուրի փախանցմամբ՝ հնարավոր է, որ նոր դաշինք ստեղծվի հենց «Լուսավոր Հայաստան» կուսակցության հետ, և գործող իշխանությունները ընտրություններին մասնակցեն բոլորովին թարմ անունով։

Նորայր Կարապետյան