Դիտարկումներ Բլինքեն-Փաշինյան և Բլինքեն-Ալիև հեռախոսազրույցներից
ՎԵՐԼՈՒԾՈՒԹՅՈՒՆՆԵՐ
ԱՄՆ պետքարտուղար Էնթոնի Բլինքենն օրերս հեռախոսազրույց էր ունեցել ՀՀ վարչապետ Նիկոլ Փաշինյանի և 2 օր անց նաև Ալիևի հետ: Տարօրինակ է, բայց Բլինքենը Փաշինյանի հետ հեռախոսազրույցում էր ասել, որ հայ-ադրբեջանական խնդիրը ռազմական լուծում չունի:
Բանն այնն է, որ ՀՀ վարչապետը միայն խոսում է խաղաղության օրակարգի մասին և երբեք ռազմական լուծման մասին չի ակնարկել: Ալիևը հրապարակային ցանկացած ելույթի ժամանակ ակնարկում է, որ եթե իրենց պահանջները չկատարվի հայկական կողմից, ապա նոր էսկալացիա է սկսելու: Հեռախոսազրույցից հետո էլ դրա մասին բացահայտ խոսեց՝ ակնարկելով, որ Փաշինյանը խոստումներ ունի տված և չի կատարում:
Բլինքենի ռազմական լուծում չունենալու մասին կոչը ևս կարելի է դիտարկել այս տեսանկյունից: Ոչ դիվանագիտական լեքսիկոնով Փաշինյանին ասում էին, որ տված խոստումները կատարի, այլապես իրենք ագրեսոր Ադրբեջանին զսպել չեն կարող: Պատերազմը տարածաշրջանում ուժեղացնելու է Ռուսաստանի դերը, ինչը, բնականաբար, Արևմուտքին հարմար չէ:
Նկատենք, որ նախորդ շաբաթ էլ ՌԴ խոսնակը հայտարարեց, որ ԼՂ հարցի լուծումը թողնում են Հայաստանի իշխանությունների խղճին: Իսկ այսօր Բլինքեն-Փաշինյան և Բլինքեն-Ալիև հեռախոսազրույցներից հետո Զախարովան, պատասխանելով հայ-ադրբեջանական հարաբերությունների կարգավորման գործում Արևմուտքի, ԵՄ-ի ներգրավվածության մասին հարցին, նշել է. «Մենք տեսնում ենք, որ իրական իրավիճակը լիովին հակառակն է, ի հեճուկս Արևմուտքի հայտարարությունների»:
Այսինքն՝ դիվանագիտական բառապաշարից դուրս ՌԴ ԱԳՆ ներկայացուցիչը Արևմուտքին մեղադրում է իրավիճակը լարված պահելու և նոր էսկալացիա հրահրելու մեջ: Այսինքն՝ Բլինքնենն ասում է, որ խնդիրը ռազմական լուծում չունի, բայց իրականում հրահրում է նոր ռազմական բախում: Այս իրավիճակում Փաշինյանին շտապեցնում է խոստումները կատարելու հարցում, այլապես սպառնում է Ալիևի կողմից ռազմական ճանապարհով դրան հասնելուն, ինչի վերաբերյալ էլ, ըստ Զախարովայի՝ Ռուսաստանը մտահոգություններ ունի:
«Մենք իսկապես անհանգստացած ենք թշնամական հռետորաբանության աճով և Ղարաբաղում միջադեպերի թվի ավելացմամբ»,- ասել է նա։ «Մենք ելնում ենք նրանից, որ խաղաղ գործընթացին այլընտրանք չկա»,- ասել է Զախարովան։
Այստեղ պետք է դիտարկել նաև ՀՀ վարչապետի շահագրգռվածությունը, որ ռազմական գործողություն սկսի: Այսպես, խոսք տվածները նա կկարողանա արդարացնել նրանով, որ պատերազմ եղավ, պարտվեցինք և կշարունակի մնալ իշխանության:
Աննա Ավետիսյան
