Հասարակությունը դասեր չի քաղում
ՎԵՐԼՈՒԾՈՒԹՅՈՒՆՆԵՐ
«Սուրմալու» առևտրի կենտրոնում բողոքի ակցիա էր:
Պատճառն այն է, որ Տեսչական մարմնի որոշմամբ՝ «Սուրմալու» առևտրի կենտրոնը փակ է մարտի 14-ից։ Այնտեղ հայտնաբերվել են տեխնիկական և հրդեհային անվտանգության նորմատիվ փաստաթղթերի պահանջների բազմաթիվ խախտումներ։
Քաղաքաշինության, տեխնիկական և հրդեհային անվտանգության տեսչական մարմնի մամուլի խոսնակ Ելենա Զոհրաբյանը նշել է, որ «Սուրմալու» առևտրի կենտրոնում հայտնաբերվել է հրդեհային և տեխնիկական անվտանգության նորմատիվ պահանջների 51 խախտում։
Նա հավելել է, որ կենտրոնը դեռ չի վերաբացվել, քանի որ խախտումները չեն վերացվել։ Մարտի 24-ին նորից վերաստուգում է նախատեսվում և աշխատակիցները բողոքի ակցիայի միջոցով պահանջում են բացել կենտրոնը և թույլ տալ իրենց աշխատել:
«Սենց չի լինի, երկու կետի որոշման պատճառով 5 հազար հոգի մնացել է օդի մեջ: Թող գան բոլոր տաղավարները բացեն ստուգեն: Ես հատուկ խնդրելու եմ, որ մենք 10 հոգով տեսչական մարմնի աշխատակիցների հետ շրջենք, որ իրենք իրենցից դուրս կետ չդնեն: Չի կարելի 2 կետի համար 5 հազար հոգու սոված թողնել: Թող գան ստուգեն, չեն գալիս»,-ասաց աշխատակիցներից մեկը:
Սա հերթական դեպքն է, երբ հասարակությունը դասեր չի քաղում, դեռ մի քանի ամիս է անցել է «Սուրմալու»-ի ողբերգական դեպքից, որը 16 մարդու կյանք խլեց: Պատճառը կրկին հրդեհային անվտանգության կանոնների չպահպանումն էր: Ողբերգական պայթյունը տեղի ունեցավ հենց այն նույն աշխատակիցների աչքի առաջ, որոնք այսօր առաջարկում են մի քանի կանոն անտեսելու գնով բացել առևտրի կենտրոնը և շարունակել խաղալ իրենց և հաճախորդների կյանքի հետ: Բոլորն էլ գիտակցում են մյուսի ֆինանսական խնդիրը, հասկանալի է, որ վարկեր ևս ունեն, բայց դրանից և որևէ մեկը չի կարելի գերադասել մարդկային կյանքին:
Խոսվում է նաև այն պատճառների մասին, որ քաղաքական նպատակներով ցանկանում են առևտրի կենտրոնն ընդհանրապես փակել: Սա հավանական տարբերակ է: Մամուլը գրում էր նաև, որ պայթունը ևս այդ նպատակով միտումնավոր էր կազմակերպվել, սակայն այդ վարկածն իրավապահները նույնիսկ չեն դիտարկել: Հիմա եթե աշխատակիցները բողոքի ակցիայի փոխարեն վերացնեն այդ տեխնիկական խնդիրներն, ապա ի՞նչ պատճառաբանությամբ է հնարավոր փակ պահել տոնավաճառը:
Իրենց ասած վարկածն իրական կլինի, եթե դրանից հետո նոր պատճառ գտնեն «Սուրմալու» առևտրի կետրոնը փակելու համար: Այդ նույն աշխատակիցները ժամանակին հայտարարում էին, որ եթե չէր կարելի, ապա թող իրենց արգելեին աշխատել, իսկ հասարակությունն էլ մեղադրում էր պատկան մարմիններին իրենց աշխատանքում թերանալու համար:
Աննա Ավետիսյան
