Որպես հասարակություն, պետք է ստիպենք պետությանը հասկանալ, որ ինքը մեր պետությունն է. ռազմական փորձագետ

Մարտի 21-ին տեղի ունեցավ  Համապարփակ պաշտպանության և անվտանգության «Ոգեզէն» համակարգի երրորդ հավաքը։

Հավաքի ընթացքում «Ոգեզէն» համակարգի ներքո գործող անհատներն ու կազմակերպությունները ներկայացրին սեպտեմբերյան մարտերից ի վեր կատարված աշխատանքը, խոսեցին ձեռքբերումների մասին և քննարկեցին ապագա անելիքները:

Ռազմական փորձագետ Հրաչյա Արզումանյանի խոսքով՝ պետք է ողջ հասարակությունը ներգրավված լինի երկրի պաշտպանության գործում և «Ոգեզէնը» հենց դրանով է զբաղված: «Միայն 80 հազարանոց հայկական բանակը չի կարողանա թշնամու հարձակումները կանխել, իսկ եթե պետությունն ունի օրինակ 200 հազարանոց պահեստազոր, որը գիտի թե ճգնաժամի ժամանակ ինչ կարող է անել, պատրաստված է, ապա Հայաստանը շանսեր ունի մարտահրավերները չեզոքացնելու»,- նշեց ռազմական փորձագետը:

Հարցին, թե այդ պայմանական ասած 80 հազարանոց բանակը որքանո՞վ է ավելացել «Ոգեզէն»-ի շնորհիվ: Արզումանյանը պատասխանեց, որ դրական արդյունքներ ունեն. «Ինձ համար տպավորիչ է, որ «Ազատազէնի» հրաձգարան, մոտ 50 հազար մարդ է այցելել և նրանցին շատերը հենց այնտեղ են զգացել, թե ոնց է կրակում զենքը: 2020թ-ին մեր հասարակությունն լրիվ այլ իրողության մեջ էր ապրում: Մեկ տարվա ընթացքում բավականին մեծ աշխատանք է տարվել»:

Ըստ Արզումանյանի՝ պետության ներգրավածությունն այս աշխատանքներում պետք է ավելի մեծ լինի: «Մնացած պետությունները, որ նման համակարգ են կառուցել, այնտեղ հիմնական կազմակերպիչը պետությունն է, իսկ մեզ մոտ պարադոսքսալ է՝ այդ աշխատանքները սկսել է հասարակությունը: Պետությունը կամաց-կամաց սկսում է միանալ այդ աշխատանքներին»,- նկատեց փորձագետը՝ դժվարանալով վերհիշել պետության կողմից  արված գործնական քայլերը:

Նկատեց, որ հատկապես ՊՆ-ի հետ համագործակցություն չի ստացվել, խոստանում էր միանալ, սակայն չէր միանում: Պետությունն այստեղ իներցիոն դեր ունի: Դիտարկմանը, որ գուցե առաջարկները այնպես չեն ներկայացվում, որ կարողանան մաս կազմել պետության ռազմավարական ծրագրերին, բանակաշինությանը, բարեփոխումներին՝ եռամսյա հավաքներ, մոդուլային կայաններ, նոր սննդակարգ, ռազմական դրության մասին օրենքի փոփոխություն և այլն, Արզումանյանը նշեց. «Դիմել ենք բոլորին՝ Ազգային ժողով, Պաշտպանության նախարարություն, Անվտանգության խորհուրդ, Արտակարգ իրավիճակների նախարարություն, սակայն պատասխանը շատ իներցիոն էր: Որպես հասարակություն, պետք է ստիպենք պետությանը հասկանալ, որ ինքը մեր պետությունն է: Պետք է մոտեցումներ փոխել, հետսովետական իրավիճակ է, երբ պետությունը հասարակությունից կտրված է: Հասարակությունը պետության դուռը թակում է և ասում է եկել ենք համագործակցենք: Պետությունն ուղղակի հայտարարել է, որ սկսում են փոփոխությունները, բայց թե դրանք ինչպիսին են, դեռ պարզ չէ»: Նկատեց, որ «Ոգեզէն» կոնցեպտը դեր ունի եռամսյա հավաքների և Ռազմական դրության մասին օրենքում փոփոխություններ կատարելու  նախաձեռնություններում և հույս հայտնեց, որ պետությունն ինչ-որ կերպ սկսել է, ինչ-որ բաներ անել:

Աննա Ավետիսյան