Տիգրան Ավինյանը ուժի ցուցադրություն է անում քաղաքապետարանում

Այսօր առավոտյան Հակակոռուպցիոն կոմիտեի կողմից ձերբակալվել են Երևանի քաղաքապետարանի աշխատակազմի նախկին ղեկավար Սեյրան Մեջլումյանը և ճարտարապետության և քաղաքաշինության վարչության պետի պաշտոնակատար Դավիթ Դալլաքյանը։

Հակակոռուպցիոն կոմիտեի մամուլի խոսնակի փոխանցմամբ, նրանք ձերբակալվել են իրենց մոտ քննվող քրեական գործի շրջանակներում։ Նախկին քաղաքապետ Հրաչյա Սարգսյանի մտերիմ Մեջլումյանն օրեր առաջ էր աշխատանքից ազատման դիմում գրել։ Փոխքաղաքապետ Տիգրան Ավինյանը շտապել է հայտարարել, թե Երևանի քաղաքապետարանում Հակակոռուպցիոն կոմիտեի վերջին գործողությունները գալիս են հիշեցնելու, որ պետական, համայնքային և հարկատուների հաշվին պաշտոն զբաղեցնելն ինչքան պատվաբեր է, կրկնակի էլ պատասխանատվության բաժին է ենթադրում:

Մեղավո՞ր են Հրաչյա Սարգսյանի մտերիմները, թե՞ ոչ, առայժմ չենք քննարկում՝ հաշվի առնելով անմեղության կանխավարկածը։ Խնդիրը, հատկապես Հրաչյա Սարգսյանի պաշտոնանկությունից հետո ստեղծված իրավիճակն է «Քաղաքացիական պայմանագիր» կուսակցությունում։ Երբ օրեր առաջ ձերբակալեցին փոխքաղաքապետ Գևորգ Սիմոնյանին, սլաքներն էլ տարան Տիգրան Ավինյանի մեկ այլ հովանավորյալի՝ առողջապահության նախկին նախարար Արսեն Թորոսյանի ուղղությամբ, դա լրջորեն թուլացրեց Տիգան Ավինյանի դիրքերը։

Անգամ իր թիմակիցները սկսեցին կարծել, թե Ավինյանն այնքան է թուլացել, որ նրա շրջապատի զտում է իրականացվում իշխանության վերին օղակների որոշմամբ։ Կասկածներ առաջացան՝ արդյո՞ք նա է լինելու Երևանի քաղաքապետի թեկնածուն։ Շատերը, այդ թվում իշխանության մեջ, սլաքներն ուղղեցին դեպի Ավինյան՝ արդարացիորեն նշելով, որ առանց գլխավոր պատասխանատուի՝ պարետի անհնար էր կոռուպցիոն նման սխեմա իրագործել։ Բանն այն է, որ նման ակնարկներ արվում էին անգամ իշխանական մամուլի կողմից, այդ թվում՝ օլիգարխների կողմից ֆինանսավորվող մամուլում։

Ուստի Տիգրան Ավինյանը պետք է նախ ցույց աներ, որ հենց ինքն է իշխանության միակ և անկրկնելի թեկնածուն, նաև ուժի ցուցադրություն աներ։ Ըստ որոշ աղբյուրների, նա ուղիղ է խոսել Նիկոլ Փաշինյանին, կոչ արել բաց և թափանցիկ խոսել, այլ ոչ տակից, մանկլավիկների միջոցով խփել իրեն։ Այժմ էլ Նիկոլ Փաշինյանի գիտությամբ էլ որոշվեց զոհաբերել Հրաչյա Սարգսյանին, որը ի սկզբանե նոխազի կարգավիճակում էր։

Հիմա, ըստ էության, իսկական պահն էր, մանավանդ, Հրաչյա Սարգսյանին հաջողվել էր ինչ-որ պահի ավելի մեծ վարկանիշի արժանանալ, քան ուներ Տիգրան Ավինյանը։ Իսկ իշխանական թևում որոշ շրջանակներ ցանկանում էին փորել Ավինյանի ոտքի տակ՝ կարծելով, թե նա ինտրիգներ է նյութում Նիկոլ Փաշինյանի դեմ։

Քաղաքապետի սրտաճմլիկ հրաժեշտը պաշտոնին, և երկու օր անց նրա մերձավորների ձերբակալությունները վկայում են՝ ամեն բան քաղաքապետարանում նոր է սկսվում։

Սերինե Բադալյան