Ադրբեջանը շարունակում է հոխորտալ և ծաղրել Փաշինյանին

Ադրբեջանը շարունակում է հոխորտալ և ծաղրել խաղաղության դարաշրջան հաստատելու փաշինյանական տվայտանքները։

Իլհամ Ալիևը նախօրեին գնացել է օկուպացված Թալիշ, որտեղ տասնյակ տներ է շահագործման հանձնել և ներկայացրել Հայաստանի հետ խաղաղության համաձայնագրի Բաքվի պայմանը՝ Ղարաբաղը պաշտոնապես ճանաչել Ադրբեջանի մի մաս։ «Որպեսզի Հայաստանը հանգիստ ապրի 29 հազար քառակուսի կմ տարածքում, կա մի պայման՝ նրանք պետք է ընդունեն մեր պայմանները, պաշտոնապես ճանաչեն Ղարաբաղը Ադրբեջանի մաս, մեր պայմանների հիմքով կատարեն սահմանազատման աշխատանքները»,- ասել է Ալիևը՝ հավելելով, թե միայն այդ դեպքում հայերը կարող են հանգիստ ապրել 29 հազար քառակուսի կմ տարածքում ինչպես ցանկանում են։

Փաշինյանը, հիշեցնենք, 44-օրյա պատերազմում կրած պարտությունից հետո բազմիցս նշել է 29 հազար 800 կմ-ի մասին, Ալիևը 800 կմ պակաս ասելով, ըստ երևույթին, նկատի ունի նաև այն տարածքներն ու անկլավները, որոնք գտնվում են Հայաստանի տարածքում և որը Ադրբեջանը պահանջում է սահամանազատման իր պայմանները կատարելու համար։

Սպառնալով և ծաղրելով փաշինյանական իշխանությանը՝ Ալիևն այս կերպ ծաղրում է նաև Հայաստանին։ Տասնամյակներ շարունակ այս վիճակում գտնվող մեր թշնամին, այսօր, շնորհիվ փաշինյանական վարչախմբի ապիկար և դավաճան էության, կարողացել է լուրջ հաղթանակներ տանել, նույնիսկ այդ պայմաններում փոխզիջումների և խաղաղության մասին չի խոսում, այլև շարունակում է կրկին ու կրկին պահանջներ ներկայացնել Հայաստանին, ինչը թերևս կարևոր ազդակ պետք է լինի հայ ժողովրդի համար՝ գիտակցելու, որ խաղաղություն նենգ թշնամու հետ անահնար է, անհնար է լինելու նաև խաղաղություն փաշինյանական վարչախմբի պաշտոնավարման ժամանակ։

Այն, որ գործող իշխանությունները վաղուց դարձել են Ադրբեջանի խամաճիկները, նրանց օրակարգի լիակատար սպասարկուները, չեն հերքում նույնիսկ գործող իշխանության ներկայացուցիչները։

Արամ Մարգարյան