Կրեմլը հատուկ խումբ է ուղարկելու Հայաստան՝ իրավիճակի օբյեկտիվ պատկեր կազմելու համար

 Ռուսաստանի իշխանությունը Հայաստանի հետ հարաբերությունները վերանայելու, նաև մեր երկրում հակառուսական տրամադրությունների իրական պատճառները հասկանալու և վերլուծելու խիստ կարիք ունի։

Մեր աղբյուրների փոխանցմամբ, Կրեմլում լուրջ դժգոհություն կա Հայաստանով զբաղվող կառույցների աշխատանքից, Պուտինի աշխատակազմում համարում են, որ ՌԴ ԱԳՆ-ն, Հայաստանում դեսպանությունը, նաև տեղում աշխատող հատուկ ծառայությունների ներկայացուցիչներն ու տարբեր էմիսարներ անբավարար են կատարում իրենց աշխատանքը, ինչի հետևանքով Հայաստանը դուրս է գալիս Ռուսաստանի վերահսկողությունից։ ՌԴ նախագահի հանձնարարականով նոր խումբ են ձևավորել, որը առաջիկայում ժամանելու է Հայաստան՝ տեղում օբյեկտիվ պատկեր ստանալու, այն անմիջապես ՌԴ նախագահի աշխատակազմին փոխանցելու համար։

Երևանում այդ խումբը հրապարակային ելույթներ չի ունենալու, զբաղվելու է միայն հետազոտություններով, տարբեր շերտերի մասնագետների, հանրային կարծիք ձևավորողների հետ հանդիպումներով, որպեսզի այլընտրանքային պատկեր կազմի Հայաստանում կատարվող իրադարձությունների մասին։

Ձևավորվող խմբի կազմում տնտեսագետներ, քաղաքագետներ, հանրային կապերի և այլ ոլորտների լուրջ և անկախ մասնագետներ են լինելու, որոնք որևէ կապ չպետք է ունենան Արտաքին հետախուզության, Անվտանգության դաշնային ծառայության, ԱԳՆ-ի և հարակից այլ մարմինների հետ։

Կրեմլն այդ մարմինների որոշ ներկայացուցիչների կասկածում է միտումնավոր կեղծիքներ տարածելու, ՀՀ գործող իշխանություններից և նրանց սատարող օլիգարխներից սնվելու, իրարամերժ տեղեկություններ փոխանցելու մեջ։ Ահռելի ֆինանսական և քաղաքական միջոցների վատնելով՝ Ռուսաստանը ոչ թե ձեռքբերումներ, այլ բացառապես կորուստներ է գրանցում հայաստանյան քաղաքականության մեջ, իսկ փաշինյանական վարչախումբն այլևս չի թաքցնում իր դժգոհությունները, անգամ դեմարշներն անում է առանց սեթևեթանքների։

Վերջերս ՌԴ Անվտանգության խորհրդի նիստում քննարկել են մերձավոր և դաշնակից պետությունների հետ հարաբերությունները, հատկապես Հայաստանի ուղղությամբ ձախողված գնահատել կատարված աշխատանքները։

Արսեն Զաքարյան