Փաշինյանը Ռուսաստանի հետ հարաբերություններում հատում է կարմիր գիծը

Օրեր առաջ տված իր խնդրահարույց ասուլիսից հետո Նիկոլ Փաշինյանը երեկ հերթական «համերգն» է տվել, այս անգամ Կառավարության նիստում։

Ընդգծելով էսկալացիայի հնարավոր վտանգը՝ Փաշինյանը կրկին Ադրբեջանին մեղադրել է Հայաստանի դեմ լայնածավալ էսկալացիա սկսելու հիմքեր ստեղծելու մեջ, պնդել, թե անկախ ամեն ինչից, Հայաստանը հավատարիմ է խաղաղության օրակարգին, միևնույն ժամանակ շարունակել մեղադրանքներ հասցեագրել Հավաքական անվտանգության պայմանագրի կազմակերպությանը և Հայաստանի դաշնակից Ռուսաստանին։

Ավելին, Ռուսաստանին պարզ և աներկբա մեղադրել 2020 թվականի նոյեմբերի 9-ի եռակողմ հայտարարությունը բավարար չափով չկատարելու մեջ և նշել, որ, եթե Ռուսաստանը որևէ օբյեկտիվ պատճառով չի կարող արցախահայության պաշտպանության դերակատարումն իրականացնել, ապա պետք է դիմի ՄԱԿ-ի անվտանգության խորհուրդ։

Այն, որ Ռուսաստանը բնավ էլ չի դիմելու ՄԱԿ-ի անվտանգության խորհրդին, պարզ էր ի սկզբանե և հասկանալի։ Այս կերպ ընդամենը Նիկոլ Փաշինյանը իր համար հիմքեր է ստեղծում Հայաստանի արտաքին քաղաքական վեկտորը փոխելու համար։ Փաշինյանի հայտարարություններին արձագանքել է ՌԴ ԱԳՆ պաշտոնական ներկայացուցիչ Մարիա Զախարովան։ Պատասխանելով հարցին, թե համաձայն է արդյոք Փաշինյանի այն հայտարարության հետ, որ Ռուսաստանը Լեռնային Ղարաբաղի անվտանգության երաշխավորն է, Զախարովան հայտարարել էր, որ եռակողմ հայտարարության մեջ նման ձևակերպում չկա։

«Պարզապես պետք է բացել այդ փաստաթուղթը, տեսնել, թե ինչ պարտավորություններ է կրում մեր կողմը և ինչ պարտավորություններ՝ ոչ, և վերջ։ Եվ ամեն ինչ բավական պարզ կլինի։ Ռուս խաղաղապահներն իրենցից կախված ամեն ինչ անում են, որպեսզի էսկալացիա թույլ չտան և կայունացնեն իրավիճակը երկրի վրա»,- նշել է Զախարովան և բոլորովին ոչ դիվանագիտական լեզվով հայտարարել. «ՀՀ ղեկավարության խղճին ենք թողնում ԼՂՀ ճակատագրի համար երրորդ երկրների վրա պատասխանատվությունը դնելու փորձերը»։ Մինչ Նիկոլ Փաշինյանը դժգոհում է Ռուսաստանին և փորձում մեղադրանքների սլաքն ուղղել Մոսկվայի ուղղությամբ, Ադրբեջանի նախագահ Իլհամ Ալիևը Թուրքիայում հայտարարել է, որ թեև Հայաստանի 2022 թվականին Պրահայում և Սոչիում ճանաչել է Ադրբեջանի տարածքային ամբողջականությունն ու ինքնիշխանությունը, դեռևս ամբողջությամբ դուրս չի բերել իր զորքերը Ադրբեջանի տարածքներից, ավելին, ըստ Ալիևի՝ Հայաստանը խուսափում է նաև Զանգեզուրի միջանցքի բացման պարտավորություններից, կոպտորեն խախտում է 2020 թվականի նոյեմբերի 10-ին ստորագրված հայտարարությունը և դրա համար պետք է պատասխանատվություն կրի։ Այն, որ նոյեմբերի 10-ին ստորագրված հայտարարության մեջ որևէ նման պարտավորություն չկա, ո՛չ Իլհամ Ալիևն է արձագանքել, ո՛չ էլ ՌԴ ԱԳՆ-ից են հերքել։

Մանե Գալստյան