Փաշինյանի անմիտ հայտարարությունը ծանր հետևանքներ է ունենալու
ՎԵՐԼՈՒԾՈՒԹՅՈՒՆՆԵՐ
Բանակում 5-րդ շարասյան առկայության և 44-օրյա պատերազմը լրտեսների, գործակալների պատճառով պարտվելու մասին Նիկոլ Փաշինյանի հայտարարությունը իսկական ցնցումներ է առաջացրել ոչ միայն հասարակության, այլև անգամ իշխանության տարբեր օղակներում։
Նույնիսկ Փաշինյանի մերձավոր զինակիցներն են հասկանում այս խոսքերի վտանգավորության աստիճանը, հատկապես այն պայմաններում, երբ Փաշինյանի այդ հայտարարությունը լրջորեն վնասում է հայկական բանակի հեղինակությանն ու մարտունակությանը։
Պաշտպանության նախարար Սուրեն Պապիկյանը երեկ Ազգային ժողովում այդպես էլ չի մանրամասնել իր անմիջական ղեկավարի վիճահարույց հայտարարությունները, նշել, թե կա նման երևույթ, և շատերն աշխատում են ի վնաս Հայաստանի։
Թեև Պապիկյանը որևէ անուն չի տվել, սակայն սենսացիոն հայտարարություն է արել, ինչը ևս վտանգավոր հետևանքներ կարող է ունենալ։ Հայաստանի ռազմական գերատեսչության ղեկավարը դրսի ուժերին մեղադրում է բանակը խարխլելու մեջ։ Ազգային անվտանգության ծառայության տնօրեն Արմեն Աբազյանն ավելի զգույշ էր, նա, ընդհանրապես հեռացել է 5-րդ շարասյան գործակալական ցանցերի մասին հարցերն անպատասխան թողելով, միայն նշելով, թե ԱԱԾ-ում ամեն ինչ մաքուր է, իսկ ԱԱԾ-ում 5-րդ շարասյան առկայության մասին հայտարարել էր հենց ինքը՝ Նիկոլ Փաշինյանը։
Ի դեպ, միայն 2022 թվականին Ազգային անվտանգության ծառայությունը 143 քրեական գործ է հարուցել զինված ուժերի զինծառայողների նկատմամաբ։ Քրեական գործերից 17-ը հարուցվել է պետական դավաճանության, 47-ը՝ կոռուպցիայի, 9-ը՝ զենքի և զինամթերքի ապօրինի շրջանառության հատկանիշներով։
Բացի այդ անցած տարի ԱԱԾ քննչական վարչությունում պետական դավաճանության և լրտեսության դեպքերով 26 քրեական գործ է քննվել, 51 պատասխանողներով, սակայն մամուլում սպրդած տեղեկությունները հայտնի և անհայտ կասկածյալների վերաբերյալ չափազանց անլուրջ են, որպեսզի միայն այդ դեպքերով հնարավոր լիներ բացահայտ մեղադրանքներ ուղղել հայկական բանակի կամ զինվորականության ուղղությամբ։
Հատուկենտ դրվագներով՝ հայկական բանակի հեղինակությունը վնասելու՝ Նիկոլ Փաշինյանի այս քայլը չափազանց վտանգավոր հետևանքներ է ունենալու, իսկ գործող իշխանությունը որևէ կերպ չի մանրամասնում։ Թերևս, այս դիսկուրսը սպառնում է լուրջ խնդիրներ հարուցել Հայաստանում կամ այն պետք է ի վերջո դադարեցնել, կամ էլ հանրությունը պարտավոր է լինելու հստակ պատասխաններ պահանջել գործող վարչախմբից։
Հասկանալի է, որ Փաշինյանն ամեն ինչ անում է պարտության մեղքը իր վրայից թոթափելու համար, ինչը, սակայն, նրան այդպես էլ չի հաջողվելու։
Մարիաննա Սաֆարյան
