Եթե ՀՀ-ն Սև լճի 20%-ի համար կռիվ չի անում, ապա Զանգեզուրի միջանցքի համար ինչո՞ւ պետք է կռիվ անի

ԱՊԱ-ի հաղորդմամբ՝ Բեռլինում Գերմանիայի նախագահ Ֆրանկ-Վալտեր Շտայնմայերի հետ հանդիպման ժամանակ Ալիեւը անդրադարձել է Զանգեզուրի միջանցքի հարցին։ 
«Ընդգծվել է, որ Հայաստանը՝ խուսափելով եռակողմ հայտարարությամբ ստանձնած պարտավորությունների կատարումից, խոչընդոտում է Զանգեզուրի միջանցքի իրականացմանը»,-մեջբերում են ԶԼՄ-ները: 

Նոյեմբերի 9-ի եռակողմ համաձայնագրում Զանգեզուրի միջանցքի վերաբերյալ որևէ կետ չկա: Խոսքը գնում է կոմունիկացիաների բացման մասին, ընդ որում՝ նման  պարտավորություն ունի  նաև ադրբեջանական կողմը : Ալիևը միջանցքի երազանքի մասին մեկ անգամ չէ, որ ակնարկել է և նույնիսկ սպառնում էր ուժով բացել այդ միջանցքը: Սա նման ոչ կոռեկտ ձևակերպմամբ առաջին դեպքն էր, երբ Ալիևը մեղադրեց Հայաստանին, միջանցք տրամադրելու պարտավորությունը չկատարելու մեջ: 

Նոյեմբերի 9-ի հայտարարությանը հղում է անում մի կողմ, որը խախտել և շարունակում է խախտել հայտարարության բոլոր կետերը: Նախ ամրագրված էր, որ զորքերը կանգնում են այնտեղ, որտեղ կային նոյեմբերի 9-ի դրությամբ, որից հետո Հայաստանի իշխանության պայմանավորվածությամբ և Արցախի իշխանության ձեռամբ հանձնվեցին Արցախի մի շարք բնակավայրեր՝ Շուշին, Քարվաճառը, Աղդանի և Մարտունու շրջաններից հատվածներ, հետո Լաչինչը, Աղավնոն, Սուսը, Ադրբեջանը նոր էսկալացիայի դիմեց Փառուխում և այլն:

Բացի դա, այդ հայտարարությունից հետո, այս պահի դրությամբ հարևան բռնատիրական երկիրը օկուպացրել է ՀՀ տարածքի 150 կմ քառ.: Նոյեմբերի 9-ի հայտարարության մյուս կետով է պարտավորվում էին գերիներին փոխանակել բոլորը բոլորի դիմաց սկզբունքով, ինչը փաստացի չի արվել, ավելին՝ Ադրբեջանը Հայաստանին գերիներ է վերադարձրել ինչ-որ պահանջ կատարելու դիմաց՝ ականապատ տարածքների քարտեզներ և այլն:

Ըստ նույն հայտարարության, Բաքուն պետք է Լաչինի միջանցքով ապահովեր տրանսպորտային հաղորդակցությունը և մարդկանց անխոչընդոտ տեղափոխումը, որը շուրջ 3 ամիս է ինչ փակ է: Այս բոլորը հիմնական կետերը շուրջ 3 տարի չկատարող Ալիևն այսօր նոր հայտարարության կետերը չկատարելուց է խոսում: Սա առնվազն ապացույց է այն մասին, որ ախորժակն ուտելիս է բացվում: Երբ ՀՀ իշխանությունը հայտարարում էր, որ Սև լճի 20 տոկոսի համար կռիվ չի անելու, 6 կմ տարածքի համար կռիվ անելու ռեսուրս չուներ, հիմա էլ տարամաբանական հարց է առաջանում՝ եթե ՀՀ-ն Սև լճի 20 տոկոսի համար կռիվ չի անում, ապա Զանգեզուրի միջանցքի համար ինչո՞ւ պետք է կռիվ անի:

Աննա Ավետիսյան