Փաշինյանի հակառուսական հերթական քայլը. Սուտը բռնվեց հաշված ժամերի ընթացքում
ՎԵՐԼՈՒԾՈՒԹՅՈՒՆՆԵՐ
Նիկոլ Փաշինյանը երեկվա ասուլիսում մի շարք արտահայտություններ է արել, որոնք հերթական անգամ վտանգում են Հայաստանը։
Մասնավորապես նա հայտարարել է, թե իր տպավորությամբ՝ հավաքական անվտանգության պայմանագրի կազմակերպությունը ցանկանալով կամ չցանկանալով հեռանում է Հայաստանից։
Այն, որ ՀԱՊԿ-ն և այնտեղ առաջին ջութակ Ռուսաստանը բնավ էլ մտադիր չեն հեռանալ Հայաստանից, պարզ է նույնիսկ ամենապարզամիտ շարքային քաղաքացուն, բայց ոչ երբեք Նիկոլ Փաշինյանի թիմին և նրա երկրպագուներին։ Ըստ էության, ստացվում է, որ այս հայտարարությամբ Նիկոլ Փաշինյանը հիմքեր է դնում Հավաքական անվտանգության պայմանագրի կազմակերպությունից ինչ-որ պահի դուրս գալու համար։
Փաշինյանը նաև անդրադարձել է ՌԴ նախագահ Վլադիմիր Պուտինի հետ նախօրեին տեղի ունեցած հեռախոսազրույցին, խրոխտ տոնով հայտարարել, թե արձանագրել է ռուս խաղաղապահների պատասխանատվության գոտում տեղի ունեցած միջադեպերի մասին։
Թե ի՞նչ է ասել Վլադիմիր Պուտինը և ի՞նչ պայմանավորվածությունների է հանգել Նիկոլ Փաշինյանը, որևէ բառ այդպես էլ լրագրողներին չի հաջողվել ստանալ, փոխարենը Նիկոլ Փաշինյանը հայտարարել է, թե Երևանը պատրաստ է մասնակցել Հայաստանի, Ռուսաստանի և Ադրբեջանի արտգործնախարարների հանդիպմանը։ «Երեկ դրա մասին նույնիսկ խոսել են Ռուսաստանի Դաշնության նախագահի հետ»։
Հիշեցնենք, որ նախորդ տարվա դեկտեմբերի 23-ին արտգործնախարար Արարատ Միրզոյանը հրաժարվել էր մեկնել Մոսկվա՝ մասնակցելու Սերգեյ Լավրովի և Ջեյհուն Բայրամովի հետ նախապես համաձայնեցված հանդիպմանը ՝ պատճառաբանելով Լաչինի միջանցքի փակ լինելու հետևանքով ստեղծված իրավիճակը։
Փաշինյանը պնդում է, թե Երևանի սուր որոշումը սուր ճգնաժամային իրավիճակի հետ էր կապված և հանդիպումը բոյկոտելու նպատակ չի եղել։ «Այդ իրավիճակում անհրաժեշտ էր, որ նախարարը լինի Երևանում, մենք ասել ենք, որ հանդիպումը չեղարկեն»,- նշել է Փաշինյանը։
Ի դեպ, հաշված ժամերի ընթացքում,վարչապետի պաշտոնը զբաղեցնող անձի սուտը բացահայտվել է, պարզվում է, որ այն օրը, երբ պետք է Արարարտ Միրզոյանը գտնվեր Ռուսաստանում և բանակցեր խաղաղության պայմանագրի շուրջ ռուսական տարբերակով, Միրզոյանը գտնվել է Երևանում, սակայն ոչ թե իր աշխատասենյակում, այլ հիփոթեքային վարկի պայմանագիր է ստորագրել և շքեղ առանձնատուն գնել Կոտայքի մարզի Քասախ գյուղում։
Թերևս Փաշինյանը այս կերպ փորձում է Ռուսաստանին համոզել, թե ինքը դեմ չէ ղարաբաղյան հակամարտության կարգավորման ռուսական տարբերակին, սակայն գործողությունները բոլորովին հակառակ են վկայում։
Սարգիս Ավետիքյան
