Ձուկը գլխից է հոտած, բայց արմատախիլ չեն անում

Հայաստանում համակարգային կոռուպցիան արմատախիլ է արված: Այս մասին 2022թ մայիսին Հաագա կատարած այցի ժամանակ հայտարարել է վարչապետ Նիկոլ Փաշինյանը:

«Ընդհանրապես Հայաստանում ես հիմա ավելի հաճախ ասում եմ, որ ժողովրդավարությունը Հայաստանի Հանրապետության հիմնական բրենդն է, որով այս օրերին մեր երկրին ճանաչում է միջազգային հանրությունը, մասնավորապես՝ Եվրոպայում, Եվրամիությունում: Պետք է ընդգծեմ, որ սա ընդամենն իմ գնահատականը չէ, որովհետև միջազգային այն ինստիտուտները, որոնք զբաղվում են ժողովրդավարության, կոռուպցիայի դեմ պայքարի, մամուլի, խոսքի ազատության գլոբալ հետազոտություններով, արձանագրում են այդ իրողությունը: Պետք է արձանագրեմ, որ 2021 թվականին առաջին անգամ Հայաստանը միջազգային ժողովրդավարական ինստիտուտների կողմից դասակարգվել է ընտրական ժողովրդավարություններ ունեցող երկրների շարքը, և սա համարում եմ կարևոր ձեռքբերում: Կոռուպցիայի դեմ պայքարի կամ կոռուպցիայի ընկալման համաթվերում վերջին տարիներին, վերջին չորս տարվա ընթացքում Հայաստանը հսկայական առաջընթաց է արձանագրել: Եվ այո՛, պետք է նաև բարձր հայտարարություն անեմ՝ ասելով, որ Հայաստանից համակարգային կոռուպցիան արմատախիլ է արված»,- ասված է Փաշինյանի ելույթում:

Երեկ էլ իրավապահ մարմինները հայտնեցին, որ բերման է ենթարկվել, ապա ձերբակալվել է Երևանի փոխքաղաքապետ Գևորգ Սիմոնյանը, ով Առողջապահության փոխնախարարն էր Արսեն Թորոսյանի օրոք: Նրա հետ բերման էր ենթարկվել ևս 10 անձ, այդ թվում է նաև ԹԱԿ ՊՈԱԿ վարակի հսկողության բաժնի ղեկավար Նաիրա Միքայելյանը և Առողջապահության նախարարի թոքաբանության և տուբերկուլյոզի գծով խորհրդական Լուսինե Եղիազարյանը: Ձերբակալությունները տեղի են ունեցել դեռ 2020թ-ին նախաձեռնված քրեական վարույթի շրջանակներում: 

Երբ իշխող թիմի ներկայացուցիչներն են կոռուպցիայով զբաղվում, ապա գոնե իրենք կոռուպցիան արմատախիլ անելու մասին պետք է չխոսեն: Գևորգ Սիմոնյանը Փաշինյանի և հատկապես նախկին առաղջապահության նախարար Արսեն Թորոսյանի մտերիմն է և հավատարիմ կադրը: Կովիդի ժամանակ մինչ փոխնախարար նշանակվելը հլու հնազանդ ղեկավարում էր Սուրբ Աստվածամայրի Կովիդ կենտրոնը, մինչ այդ էլ Այրվածքաբանության իստիտուտի տնօրենի ԺՊ-ն էր և գիտական աստիճան ունեցող բժշկին առաջարկում էր բանվորի կամ տեխնիկի հաստիք: Իհարկե, գուցե, ինչ-որ մի բանում թերացել է: Մեկ անգամ չէ, որ համոզվել ենք, վարչապետի՝ ոչ հավատարիմ կադրերին չներելու մեջ՝ ԿԳՄՍ փոխնախարար Գևորգ Լոռեցյան, ՊՎԾ պետ Դավիթ Սանասարյան, ՊՆ բազմաթիվ պաշտոնյաներ և այլն: Որևէ մեկի անմեղության կանխավարծը չխախտելով, կորոնավիրուսային չարաշահումները և երկիր ուղարկված բազմաթիվ օգնությունները հասցեատերերին չգտնելու մասին ահազանգում էին բազմաթիվ քաղաքացիներ, հարցը բարձրացնում էին, նաև ընդդիմադիրները, սակայն բոլորն էլ հրաշալի հասկանում են, որ փոխնախարարը, ԱՆ գլխավոր խորհրդատուն և մյուսները չէին կարող գործել առանց նախարարի, բայց հետաքրքրական է, որ Արսեն Թորոսյանի անունն այս գործով չի շոշափվում:

Ժամանակին, երբ Թորոսյանը նախարար էր՝ խոսվում էր այն  մասին, որ Նիկոլ Փաշինյանի դեմ «կոմպրոմատ» ունի: Հիմա այս քրեական վարույթը կամ կհերքի, կամ էլ կհաստատի այս վարկածը: Այլապես սա նման կլինի, մարտի մեկի գործին, որտեղ այդպես էլ որևէ կարգավիճակ չունեցավ Լևոն Տեր-Պետրոսյանը:

Աննա Ավետիսյան