Փաշինյանի դեմարշը ՀԱՊԿ-ի դեմ կարող է լուրջ հետևանքներ ունենալ

Հայաստանը հրաժարվել է Հավաքական անվտանգության պայմանագրի կազմակերպությունում գլխավոր քարտուղարի տեղակալի իր քվոտայից։

Երեկ առավոտյան մամուլում տարածված լուրերը ի վերջո հաստատել է ԱԳՆ խոսնակ Վահան Հունանյանը, սակայն որոշման պատճառների մասին չի ցանկացել խոսել։

Հայաստանը հատկապես 44-օրյա պատերազմի ժամանակ և դրանից հետո բազմիցս է արտահայտել իր դժգոհությունը ՀԱՊԿ-ից։ Երևանը կառույցից պահանջում էր դատապարտել նաև անցած տարի ադրբեջանական ներխուժումը Հայաստանի ինքնիշխան տարածք, բայց պահանջն այդպես էլ անկատար մնաց, և հունվարին էլ Երևանը չեղարկեց Հայաստանում նախատեսված ՀԱՊԿ զորավարժությունները։ Ըստ Փաշինյանի՝ կառույցից դեռ կոնկրետ գնահատականների են սպասում, հասկանալու որևէ դաշինքի պատասխանատվության ուղին։ Թեև Հայաստանի իշխանություններն ու անվտանգության խորհրդի քարտուղար Արմեն Գրիգորյանը փորձում են համոզել, թե գլխավոր քարտուղարի տեղակալի քվոտայից հրաժարվելը քաղաքական ուղերձ ու դեմարշ չէ, սակայն փաստն այն է, որ այս քայլը իրականում ուղղված է ոչ միայն ՀԱՊԿ-ի դեմ, այլ նաև առաջին հերթին՝ Ռուսաստանի։ Արտաքին քաղաքական վեկտորի փոփոխության՝ Հայաստանի վերջին քայլերը լիովին տեղավորվում են այս համատեքստում։

Փաշինյանական վարչախումբը փորձում է լքել Ռուսաստանի հետ կապված բոլոր կառույցները և դրանք անում է բավականին հետևողականորեն, փոքր քայլերով՝ անընդհատ վնասելով հայ-ռուսական հարաբերություններին։ Իհարկե, ողջամիտ ձայն է հնչում, թե ինչով է փոխարինվելու ՀԱՊԿ-ն Հայաստանի համար և ինչ վտանգներ կան, արդյոք փաշինյանական վարչախումբը հաշվարկել է իր այս չկշռադատված քայլի հետևանքները, որևէ ուղերձ և որևէ բացատրություն այդպես էլ չի հնչում, ընդհակառակը գործող իշխանություններն ամեն ինչ անում են ծածուկ, ծպտված և ի վերջո փաստի առաջ են կանգնեցնում Հայաստանին։

Ռուսաստանը բնականաբար ինչ-որ պահի պատասխանելու է Նիկոլ Փաշինյանի այս գործողություննրին, բայց փաստն այն է, որ Հավաքական անվտանգության պայմանագրի դեմ հերթական այս դեմարշը լրջագույն ռազմական ու քաղաքական հետևանքներ է ունենալու Հայաստանի Հանրապետության համար։

Մարինե Գալստյան