Առողջապահության նախկին ու ներկա նախարարների հեռակա «փոխհրաձգությունը». Ո՞ւր կհասնի գզվռտոցը
ՎԵՐԼՈՒԾՈՒԹՅՈՒՆՆԵՐ
Հայաստանում կարմրուկի դեպքերի ավելացող աճը, ինչպես նաև ՀՀ առողջապահության նախարարության անձեռնահասությունը կրկին անգամ ցրել են հակասությունները իշխող թիմի կազմում։
Երեկվա դրությամբ Հայաստանում կարմրուկի լաբարատոր հաստատված դեպքերի թիվը հասել է 20-ի, հոսպիտալացված են 18-ը։ Առողջապահության նախարար Անահիտ Ավանեսյանն ասել է, թե բոլոր պացիենտների միջին ծանրության է, գտնվում են բժիշկների հսկողության տակ։
Ըստ Ավանեսյանի՝ հիվանդներից 15-ը երեխաներ են, 5-ը՝ մեծահասակներ։ Նախարարը նշել է, թե կարմրուկի առաջին դեպքը Հայաստան է ներթափանցել արտերկրից, հիվանդը երեխա է եղել, որից հետո վարակվել են այլ անձինք։
Առողջապահության գործող նախարարի այս հայտարարությունները գրեթե հակադրվում են նախկին նախարար Արսեն Թորոսյանի խոսքերին։ Թորոսյանը երեկ ֆեյսբուքյան ուղիղ եթերում խոսել է կարմրուկի դեպքերի գրանցման մասին, նշել , թե իր տեղեկություններով վարակումը հիվանդանոցի ներսից է տարածվել, հիվանդ երեխայից մյուսներին, նաև մի տեղեկություն կա, որ այդ տարածման օղակում դեր է ունեցել չպատվաստված բուժաշխատող։
Ըստ Թորոսյանի՝ բժիշկները, բուժաշխատողները, բուժքույրերը իրականում կոչված են քաղաքացիներին օգնելու, դիմակայելու հիվանդություններին, սակայն նրանք ևս երբեմն տուրք են տալիս դավադրապաշտական տեսություններին։ Առողջապահության նախարարությունը կոշտ է արձագանքել նախկին նախարարին, գործող նախարարի մամուլի քարտուղար Հռիփսիմե Խաչատրյանը գրառում է արել, թե հորդորում է մեկ ամբողջական «փազլում» չհամադրել հավաստի, ոչ հավաստի, ստուգված, չստուգված տեղեկատվությունները։ «Մի բան էլ, ընդհանրապես վարակիչ հիվանդությունների դեպքում վարակիչ շղթայում հայտնվածների թիրախավորումն անընդունելի և անթույլատրելի է»,- նշել է նախարարի մամուլի քարտուղարը։
Խնդիրը բնավ էլ կարմրուկը չէ այս դեպքում, այլ նախկին և ներկա նախարարների հակասությունը։ Արսեն Թորոսյանը, տեղափոխվելով վարչապետի աշխատակազմի ղեկավարի, ապա և Ազգային ժողովի պատգամավորի պաշտոնին, մեծ ախորժակ ուներ այլ ավելի բարձր պաշտոնի անցնելու, իսկ այժմ էլ ցանկանում է սեփական ձեռքերով հեռացնել իր իսկ բերած ոչ բժիշկ կադրին և ինքը կրկին զբաղեցնի առողջապահության նախարարի պաշտոնը։
Անահիտ Ավանեսյանն էլ մեր տեղեկություններով՝ ոչ միայն հակադրվում է, այլև ամեն կերպ պայքարում իր նախկին վերադասի դեմ։ Տեսնենք, թե ինչ ուշագրավ զարգացումներ կունենա նախկին և գործող նախարարների հակասությունը։
Անի Սարդարյան
