Արդյո՞ք երկրի հարկային չարաշահումներն այն թեման է, որ պետք է վարչապետի մակարդակով քննարկվի այլ երկրում

Գերմանիայում հայ համայնքի հետ հանդիպմանը Հայաստանի վարչապետ Նիկոլ Փաշինյանն անդրադարձել է «Նոր Զովք» սուպերմարկետում հայտնաբերված խախտումներին, ըստ որի՝ ընկերությունը պետությանը 4 մլրդ 127 միլիոնից ավելի դրամ հարկ չի վճարել։

«Ոչ մեկի անմեղության կանխավարկածը չխախտեմ, բայց  հայտնաբերվել է, որ մի սուպերմարկետ 4 միլիարդ դրամի հարկ չի վճարել, երեկ մի ռեպորտաժ տեսա, ասացի՝ մեկնաբանությունները նայեմ, մարդիկ գրում էին, որ էս սուպերմարկետին բռնել են, որ էն  մյուսի գործերը լավ գնա։ Ասում են՝ էլի սարքեցիք։ Ոչ ոք չի ասում՝ դա իրականությո՞ւն է, թե՝ ոչ։ Ասում են՝ սարքեցին, «Նոր Զովքը» փակում են, որ «Երեւան Սիթին», «Քարֆուրը» ավելի լավ աշխատի։ Եղավ, ձեր ասածն է, հրապարակային դատավարությունը ցույց կտա՝ ինչը ինչի համար է եղել։ Բոլորը պետք է վճարեն հարկերը, հարկերի չվճարումը պետք է պետական համարժեք արձագանք ստանա»,– ասել է Նիկոլ Փաշինյանը։

Արդյո՞ք երկրի հարկային չարաշահումներն այն թեման է, որ պետք է վարչապետի մակարդակով քննարկվի այլ երկրում: Իրականում դա նման է իրավիճակի, երբ ընտանիքի տղամարդն իր և կնոջ անձնական խնդիրների մասին պատմում է հարևաններին: Նման մարդկանց հարևանները թեև ուշադիր լսում են, բայց չեն հարգում և քամահրանքով են վերաբարվում: Հայաստանի այսքան խնդիրների մեջ արդյո՞ք հայ համայնքին հետաքրքրում էր սուպերմարկետի ենթադրյալ չարաշահումը: Գուցե՞ Փաշինյանի անդրադարձն ավելի ամրապնդի այն վարկածը, որ ստուգումները միտումնավոր են և սուպերմարկետի մտավախություններն իրականություն են: Բանն այն է, որ եթե կա նման կասկած երեք միլիոն վարչապետերի մոտ, ապա Փաշինյանը պետք է հանձնարարեր, որ ՏՄՊՊ հանձնաժողովն ևս մասնակցի վարույթին: Այլ հարց է, որ եթե անկախ ամեն ինչից ու ստուգումների իրական դրդապատճառից «Նոր Զովք»-ն աշխատել է խախտումներով, ապա պետք է ենթարկվի օրենքով սահմանված պատասխանատվության:

Սովորաբար, երբ մեկ տեղում հայտնաբերվում է խախտում, դա դառնում է դրդապատճառ մյուս նման կառույցներում ևս ստուգումներ անցկացնելու: Օրինակ, երբ գազալցակայաններում ՀԴՄ կտրոն չէին տրամադրում՝ Փաշինյանն ԱԱԾ պետին հանձանարարում էր ստուգել բոլորը, երբ դիրքերից մեկում հրդեհ բռնկվեց՝ ստուգումներ սկսվեցին բոլոր կացարաններում և այլն: Այդ կասկածներին օբյեկտիվ գնահատական տալու համար պետք է ստուգումները շարունակվեն բոլոր սուպերմարկետներում՝ լինի դա «Երևան Սիթին», «Քարֆուրը», «Սասը», էական չէ, հատկապես, որ իրապես ողջամիտ կասկած կա, որ եթե մեկ սուպերմարկետ կիրառում է հատուկ տեխնոլոգիա, ապա մյուսներին ևս նման ծառայության առաջարկ կարող է արված լինել: Ընդունե՞լ են, թե՞ ոչ՝ այլ հարց է:

Աննա Ավետիսյան