Հայ և հույն նախարարների տարբերությունը

Հունաստանում օրերս երկաթուղային խոշոր վթար է եղել, որից հետո հրաժարականի դիմում է ներկայացրել տրանսպորտի և ենթակառուցվածքների նախարար Կոստաս Կարամանլիսը։ Նախարարը հայտարարել է, թե իր հրաժարականը ամենաքիչն է, որը նա կարող է անել՝ հարգելով վթարի 57 զոհերի հիշատակը։ «Այսպիսի ողբերգությունից հետո անհնար է ապրել այնպես, ասես ոչինչ տեղի չի ունեցել»,- նշել է նախարարը և տեղի ունեցածի քաղաքական պատասխանատվությունը վերցրել իր վրա։

Հիշեցնենք, որ երկաթուղային վթարից հետո իշխանությունները ձերբակալել են տեղի կայարաններից մեկի աշխատակցին, որը սխալ ուղղությումբ էր ուղարկել ուղևորատար գնացքը և այն բախվել էր բեռնատար գնացքին։ Ի սկզբանե ակնհայտ էր, որ առնվազն նախարարը որևէ քրեական կամ մասնագիտական պատասխանատվություն չի կարող կրել, սակայն նա քաղաքական պատասխանատվություն է ստանձնել՝ գիտակցելով, որ տեղի ունեցած ողբերգությունը առաջին հերթին հարվածում է իր սեփական երկրի հեղինակությանը և բարոյական առումով ճիշտ քայլ է կատարել՝ հրաժարական ներկայացնելով։

Ահա այստեղ է հույն նախարարի և նրա հայ մերօրյա գործընկերների տարբերությունը։ 2020 թվականի 44-օրյա պատերազմից հետո, երբ Նիկոլ Փաշինյանը հայտարարեց, որ ինքն է թիվ 1 պատասխանատուն, բայց ոչ մեղավորը և հրաժարվեց հրաժարական ներկայացնել, Հայաստանում բազմաթիվ դեպքեր ու առիթներ են եղել, երբ իշխանությունների անմիջական պատասխանատվությամբ և մեղքով ողբերգական դեպքեր են տեղի ունեցել, սակայն որևէ նախարար, որևէ պաշոնյա այդպես էլ համարձակություն և տղամարդկություն չի ունեցել ստանձնելու այդ պատասխանատվությունը և հրաժարական ներկայացնելու։

Ամենաթարմ օրինակն էլ Գեղարքունիքի մարզի Ազատ գյուղում տեղ ունեցած ողբերգությունն էր, երբ 15 զինվորներ մահացել էին հակահրդեհային որևէ միջոց չունեցող զորանոցի տարածքում։ Դրանից անմիջապես հետո հանրությունը պահանջում էր պաշտպանության տխրահռչակ նախարար Սուրեն Պապիկյանի հրաժարականը, սակայն վերջինս ոչ միայն մնաց իր պաշտոնին, այլև նույնիսկ հարկ չի համարում հանդիպել զոհված զինծառայողների ծնողների հետ։ Միգուցե կարող են գործող իշխանությունների սպասարկուները գալ և փորձել արդարացնել Փաշինյանի, Սուրեն Պապիկյանի և գործող վարչախմբի մյուս ներկայացուցիչների վարքը, սակայն փաստն այն է, որ իշխանության եկած ապիկարների և չտեսների այս խառնամբոխը անգամ իր լիազորությունները չկատարելու համար չի ցանկանում պատասխանատվության ենթարկվել, էլ ուր մնաց քաղաքական պատասխանատվություն կրել Հայաստանում ստեղծված իրավիճակի համար։ 

Սարգիս Մուրադյան