«Հայաստանում պատմել են, թե ինչու են Քոչարյանին հետապնդում Փաշինյանի օրոք»
ՎԵՐԼՈՒԾՈՒԹՅՈՒՆՆԵՐ
Rossaprimavera.ru-ն գրում է, որ ՀՀ վարչապետ Նիկոլ Փաշինյանի կուրատորները նրա իշխանության գալուց հետո պահանջել են պատժել հանրապետության երկրորդ նախագահ Ռոբերտ Քոչարյանին 2008 թվականի գունավոր հեղափոխությունը տապալելու համար: Այդ մասին իր ֆեյսբուքյան էջում գրել է հայ լրագրող Գևորգ Խաչատուրյանը: Լրագրողը հիշեցրել է, որ 2008 թվականի մարտի 1-ին Հայաստանում իրականացվեց նարնջագույն հեղափոխության առաջին փորձը։ Նրա խոսքով, արևմտյան կուրատորներն այն շատ մանրակրկիտ էին պատրաստել, և վիթխարի ռեսուրսներ ներդրել Լևոն Տեր-Պետրոսյանի թեկնածության վրա։ «Եվ դա է պատճառը, որ տասը տարի անց Նիկոլի կուրատորներն այդքան համառորեն պահանջում են, որ նա պատժի Քոչարյանին: Ի վերջո, նա թույլ չտալով, որ «սորոսաբույնը» այն ժամանակ գրավի իշխանությունը նրանց միլիոնավոր դոլարները լցրեց կոյուղի», - գրել է Խաչատուրյանը։
Նրա խոսքով, ՀՀ երկրորդ նախագահի ամուր քաղաքական կամքի շնորհիվ է, որ երկիրը ստացավ խաղաղ կյանքի ևս 10 տարի։ «Եվ Արցախը ևս ստացավ 10 տարվա անվտանգություն, քանի որ թշնամին վախենում էր անգամ մեր ուղղությամբ նայել»,- հավելել է նա։
Հիշեցնենք, որ 2008 թվականի փետրվարին Հայաստանում տեղի ունեցան նախագահական ընտրություններ, որոնց 10 տարվա ընդմիջումից հետո մասնակցեց հանրապետության առաջին նախագահ Լևոն Տեր-Պետրոսյանը։ Նա պարտվեց ընտրություններում, բայց չճանաչեց քվեարկության արդյունքները և կողմնակիցներին տարավ չարտոնված բողոքի ցույցերի: 2008 թվականի մարտի 1-ի առավոտյան Երևանում ոստիկանությունը ցրեց Տեր-Պետրոսյանի կողմնակիցների չարտոնված հանրահավաքը, որը շարունակվում էր 20 օր առանց միջադեպերի։ Փողոցային ապօրինի ցույցերի առաջնորդներից մեկը Հայաստանի ներկայիս վարչապետ Նիկոլ Փաշինյանն էր։ Նույն օրը երեկոյան Հայաստանի մայրաքաղաքում զանգվածային փողոցային անկարգություններ են եղել, ինչի հետևանքով զոհվել է տասը մարդ, այդ թվում՝ երկու ոստիկան։ Ավելի քան երկու հարյուր մարդ, որոնց մեծ մասը ոստիկաններ էին, տուժել են։ Արյունահեղությունը դադարեցնելու համար ՀՀ երկրորդ նախագահ Ռոբերտ Քոչարյանը Երևանում արտակարգ դրություն է հայտարարել, և դադարեցվել են փողոցային անկարգությունները։ Հետո՝ 2018 թվականին «թավշյա» պետական հեղաշրջման արդյունքում Հայաստանում իշխանության եկավ Նիկոլ Փաշինյանը, և սկսվեց հանրապետության երկրորդ նախագահ Ռոբերտ Քոչարյանի քրեական հետապնդումը։
Նյութը հրապարակման պատրաստեց Կամո Խաչիկյանը
