Բայրամովի արած հայտարարությունները վերահաստատում են, որ կողմերը շտապում են.Հայաստանի մասով հարցականները շատ են

Ավարտվել է ՌԴ ԱԳ նախարար Սերգեյ Լավրովի երկօրյա այցը Բաքու։ Լավրովն Ադրբեջանում հանդիպում ունեցավ ԱԳ նախարար Ջեյհուն Բայրամովի և Իլհամ Ալիևի հետ։ Հանդիպումը տարբերվում էր նրանով, որ տեղի էր ունենում Լաչինի միջանցքի արգելափակման և ԵՄ առաքելության տեղակայման պայմաններում։ Բնականաբար, ի թիվս այն հարցերին քննարկվեց այս երկուսը ևս։

Այցի մասին հայտարարություն անելիս ռուսական արտաքին քաղաքական գերատեսչության խոսնակ Մարիա Զախարովան այդ մասին ակնարկել էր՝ հղում անելով հայ-ռուս-ադրբեջանական եռակողմ հայտնի հայտարարություններին։ Այցից առաջ էլ կարելի էր ենթադրել, որ որոշակի քննարկումներ տեղի են ունենալու՝ կապված հայ-ադրբեջանական կնքվելիք խաղաղության պայմանագրի հետ։

Այստեղ, բնականաբար, կաևոր գործոն է Արևմուտքի ակտիվացումը տարածաշրջանում։ Ի դեպ, Մոսկվան դիտորդների տեղակայմանը չափազանց բացասական է արձագանքել և հնչած արտահայտություններն էլ այդ կոնտեքստում են։ ԵՄ առաքելության մասով վարչապետի արված հայտարարությունն այն մասին, թե Ադրբեջանը կասկածներ ունի` ռուսները  համատեղ հարձակում են կազմակերպում, և ՀԱՊԿ-ի, ՌԴ ռազմաբազայի տեղակայումը սպառնալիք է, Լավրովը հերքեց դիվանագիտորեն՝ ցույց տալով, որ Բաքուն նման մտավախություն չունի:

Բաքվում Լավրովն ասաց, որ Նիկոլ Փաշինյանի խոսքերը թողնում է վերջինիս խղճին: Այսինքն, Բաքվում Ռուսաստանին ոչ թե մեղադրում են Ադրբեջանի դեմ ինչ-որ սպառնալիք ստեղծելու մեջ, այլ ուզում են Լավրովին ցույց տալ, թե ինչքան վատն է Ռուսաստանի ռազմավարական դաշնակիցը՝ ի դեմս Հայաստանի և նրա ղեկավարության: Բացի այդ էլ Ալիևը առիթը բաց չէր թողնում հիշեցնելու, որ հայ-ադրբեջանական հարաբերությունների կարգավորման գործում մեծ դերակատարում ունի Մոսկվան։

Նա նշել է, որ ընդունվել են մի շարք փաստաթղթեր, որոնք ապագա խաղաղության պայմանագրի համար կոնցեպտուալ նշանակություն ունեն։ Ըստ Ադրբեջանի նախագահի՝ խոսքը Սոչիում և Պրահայում ընդունված փաստաթղթերի մասին է, որոնցով երկու երկրների կողմից փոխադարձաբար ճանաչվում են մեկմեկու ինքնիշխանությունը, տարածքային ամբողջականությունը։

Լավրովը նաև հայտարարել է, որ թեև Մոսկվան պատրաստ է բանակցային հարթակ տրամադրել Երևանին և Բաքվին, սակայն չի պնդում, որ Հայաստանի և Ադրբեջանի միջև բանակցություններն անպայման ընթանան Մոսկվայում։ Ապա շարունակելով հայտնել է, որ ողջունում են երկու երկրների միջև հարաբերությունների կարգավորմանը այլ երկրների ջանքերը և դեմ չեն դրան։

Կարևոր է նաև այն, որ Ադրբեջանի նախագահ Իլհամ Ալիևը ՌԴ ԱԳ նախարար Սերգեյ Լավրովի հետ հանդիպման ժամանակ հայտարարեց, որ հույս ունի, թե 2023 թվականը բեկումնային կլինի Հայաստանի և Ադրբեջանի հարաբերությունների նորմալացման մասով, և Ադրբեջանում մեծապես հույս են տածում, որ հենց այդպես էլ կլինի։

Ստացվում է՝ կան հստակ ժամկետներ և Բայրամովի արած հայտարարությունները, որ կա օնլայն համագործակցության ՀՀ-ի հետ, առնվազն առաջարկներ փոխանցելու մասով վերահաստատում են, որ կողմերը շտապում են։ Ադրբեջանի պարագայում այն հասկանալի է, Իսկ Հայաստանի մասով հարցականները շատ են։

Աննա Ավետիսյան