Խնամի-ծանոթ-բարեկամ. Պաշտոնները միայն «կարկանդակ սիրողների» ազգականներին
ՎԵՐԼՈՒԾՈՒԹՅՈՒՆՆԵՐ
Ժամանակին ընդդիմադիր Նիկոլ Փաշինյանն ու նրա այսօրվա թիմակիցները փրփուրը բերաններին քննադատում էին նախկին իշխանություններին՝ տարբեր պաշտոններում իրենց մտերիմներին նշանակելու, ԽԾԲ սկզբունքով մարդկանց առաջ քաշելու համար։
2018թ. «հեղափոխությունից» հետո Փաշինյանն ինքն է գերազանցել նախկիններին՝ երկրաչափական պրոգրեսիայով, հնարավոր բոլոր պաշտոններին իր, իր տիկնոջ և կուսակիցների ազգականներին, բարեկամներին, բանակի ընկերներին նշանակելով։
«Քաղաքացիական պայմանագիր» խմբակցությունը Գյումրիի փոխքաղաքապետի պաշտոնում կառաջադրի Գյումրիի ավագանու անդամ Վահագն Մկրտչյանի թեկնածությունը։ 28-ամյա այդ երիտասարդը քաղաքական անցյալ չունի, նրա մասին հայտնի է միայն, որ ատամնաբույժ է ու վարչապետի տիկնոջ՝ Աննա Հակոբյանի ազգականը:
Ի դեպ, Գյումրիի մյուս փոխքաղաքապետը՝ Արթուր Պապիկյանը, Սուրեն Պապիկյանի հորեղբոր որդին է։ Գյումրիում վաղուց ավանդույթ է դարձել բարձր պաշտոններին որևէ ՔՊ-ականի ազգականին նշանակելը։ Նախկին փոխքաղաքապետ, ներկայումս պատգամավոր Դավիթ Առուշանյանն էլ այդ պաշտոնին նշանակվել էր բացառապես «Շիշ բռնող» մականունով հայտնի Հայկ Սարգսյանի՝ ՍԱՏՄ ղեկավարի տեղակալ փեսայի բարեկամը լինելու «արժանիքի» համար։
Եվ այսպես, գործող վարչախումբը, չունենալով կադրային բազա, կրթված ու բանիմաց կառավարիչներ, բարձր պաշտոններին նշանակում է միայն խնամիներին/ծանոթներին/բարեկամներին։
Թքած, որ այդ մարդիկ ունակ չեն երեք բառ հոդաբաշխ իրար կապել, գլուխ հանել պաշտոնով սահմանված պարտականություններից, կամ էլ կատարել տարրական ու պարզ հանձնարարությունները։ Կարևորը, լինեն որևէ ապիկարի մերձավոր ազգականը, սոցցանցերում էլ ինքնամոռաց տարածեն «Քաղպայմանագրի» կամ նրա առաջնորդի «մտքի գոհարները»։ Իսկ Փաշինյանն ու յուր տիկինը Գյումրիի մասին կհիշեն միայն հերթական ձեթոտ կարկանդակը ախորժակով խփշտելու համար։
Մարինե Ազատյան
