Հակակոռուպցիոն դատարանի ապտակը Նիկոլ Փաշինյանին
ՎԵՐԼՈՒԾՈՒԹՅՈՒՆՆԵՐ
Հակակոռուպցիոն դատարանը երեկ մերժել է Ազգային անվտանգության ծառայության միջնորդությունը գեներալ-մայոր Գրիգորի Խաչատուրովի կալանավորման վերաբերյալ։
Բարձրաստիճան նախկին զինվորականը դատարանի դահլիճից ազատ է արձակվել։ Խաչատուրովին ձերբակալել էին նախօրեին, երրորդ բանակային կորպուսի հրամանատարի պաշտոնը զբաղեցնող գեներալ-մայորին մեղադրում էին փողերի լվացման մեջ։
Գործը, ըստ փաստաբանների, կապված է պաշտպանության նախկին նախարար, «Հայաստան» խմբակցության ղեկավար Սեյրան Օհանյանին առնչվող քրեական գործի դրվագներից մեկի հետ։ Փաշինյանական վարչախումբը Խաչատուրովի դեմ իր վրեժխնդրությունն իրականացնելիս գործել է առավելագույնս ճղճիմ և սրիկայական մեթոդներով։ Ձերբակալության ընթացքում Գրիգորի Խաչատուրովը ոչ սնունդ է ստացել, ոչ իրեն անհրաժեշտ դեղորայքը։
Ըստ փաստաբանների՝ մեղադրանքը ևս բացարձակապես անհիմն է, նշվում էր, թե իբր Սեյրան Օհանյանը զորամասի տարածք է վաճառել Գրիգորի Խաչատուրովին և նա էլ գրավադրել է այդ տարածքը ավելի բարձր գնով, ուստի և գեներալ-մայորին մեղադրում են փողերի լվացման մեջ։ Փաստաբանները դատարանի դահլիճում ապացուցել են, որ բոլորովին այլ գույք է դրված եղել գրավի, իսկ զորամասն ընդամենը օժանդակ գրավ է եղել։
Ինչպես և սպասելի էր, մեղադրանքը փլուզվել է դատարանում և հակակոռուպցիոն դատարանի դատավորը հրաժարվել է կալանավորել Գրիգորի Խաչատուրովին՝ նրան ազատ արձակելով։ Իհարկե, փաշինյանական վարչախումբը բնավ էլ մտադիր չէ կանգ առնել կամ հետ կանչել ապօրինի մեղադրանքը։
Գրիգորի Խաչատուրովը, նշենք, միակ գեներալն էր, որը 2020 թվականի պարտությունից հետո տեր կանգնեց իր ստորագրությանը և մինչ օրս շարունակում է Նիկոլ Փաշինյանի հրաժարականը պահանջել։ Հայկական բանակի մյուս բոլոր գեներալներն ու գնդապետները, որ ստորագրել էին այդ աղմկահարույց պահանջի տակ, կամ գլխահակ շարունակեցին իրենց ծառայությունը, կամ էլ հաճույքով պատվի են առնում Նիկոլ Փաշինյանի առջև՝ մոռանալով իրենց իրական պարտականությունները։
Մերի Խաչատրյան
