Բանակում ամենաթողությունը շարունակվում է. Զոհերի գլխավոր մեղավորն իշխանությունն է

Հայկական բանակը նախօրեին միանգամից 3 զոհ ունեցավ, այն էլ ոչ մարտական պայմաններում։ Քննչական կոմիտեի փոխանցմամբ՝ զինծառայող Հայկ Պետրոսյանը ինքնասպան է եղել Իջևանի զորամասում՝ գլխին արձակած կրակոցից։

Երկու զինծառայող էլ մահացել են ՊՆ ուազի վթարի հետևանքով։ Վիճակագրությունը փաստում է՝ տարիներ շարունակ հայկական բանակում մահացության դեպքերի մեծ մասը ոչ մարտական պայմաններում է արձանագրվում, թերևս չհաշվելով 2020 թվականի պատերազմի ողբերգական հանգամանքները, կարելի է փաստել, որ տարեցտարի մարտական պայմաններում զոհերի թիվը աճում է։

Հելսինկյան քաղաքացիական ասամբլեայի Վանաձորի գրասենյակը ամեն տարի տվյալներ է հավաքում, միայն անցած տարի Հայաստանի զինված ուժերում և Արցախի պաշտպանության բանակում 64 մահվան դեպքերից 14-ն է հրադադարի խախտման հետևանքով եղել։ Այս վիճակագրության մեջ ներառված չեն ադրբեջանական լայնածավալ հարձակման 200-ից ավելի զոհերը։

Մյուս դեպքերը պաշտոնական վարկածով, ավտովթարներ, առողջական խնդիրներ, ինքնասպանություն, թե սպանություն, ականի պայթունի հետևանք է եղել։ Իրավապաշտպանները նաև ահազանգ են հնչեցնում, որ զինված ուժերում մահերի մեծ մասը որպես կանոն որակվում է ինքնասպանություն, թեև դրանք կամ սպանություն են, կամ էլ ինքնասպանության հարկադրանք։

Իրավապաշտպանները հատկապես տարօրինակ են գտնում, որ ինքնասպանություն որակող դեպքերը հենց միանգամից են այդպիսին որակում՝ առանց քննչական գործողությունների կատարման։ 2010-2020 թվականների հարուցված մահվան դեպքերն ուսումնասիրվել և պարզվել են, որ այդ գործերը որոշ դեպքերում կարճվում են կամ կասեցվում, հանցակազմի բացակայության պայմաններում։

Թերևս 2018 թվականի այսպես կոչված հեղափոխությունից հետո , հանրության զգալի մասը ակնկալում էր, որ բանակում դրական փոփոխություններ կունենան, ավելին, ոչ միայն 2020 թվականի ողբերգական պատերազմի հետևանքով Հայաստանը կորցրեց իր տարածքների զգալի մասը, ինչպես նաև մինչ օրս չի կարողանում վերականգնել բանակի մարտունակությունը, այլև ցավալի և ողբերգական իրադարձությունները, ոչ կանոնադրային հարաբերությունների հետևանքով մահերը, շարունակում են տեղ գտնել Հայկական բանակում, ինչը վկայում է կրկին ու կրկին գործող իշխանությունների ապիկարության և հանցագործություններն ամեն գնով կոծկելու քաղաքականության մասին։ 

Վարդուհի Գրիգորյան